અરવલ્લી જિલ્લાના નારણપુરમાં સરકારી અનાજ દુકાનમાં ઘઉં, ચોખા અને ખાંડની જથ્થાની મોટી ઘટ

અરવલ્લી જિલ્લાના મેઘરજ તાલુકાના નારણપુર ગામમાં સરકારી સસ્તા અનાજની દુકાનમાં જથ્થાની ઘટનો મામલો સામે આવ્યો છે.

પ્રાથમિક તપાસ મુજબ, ઘઉંમાં 3,716 કિલોગ્રામ, ચોખામાં 2,883 કિલોગ્રામ અને ખાંડમાં 695 કિલોગ્રામની મોટી ઘટ નોંધાઈ.

જથ્થાની ઘટ છુપાવવા માટે ઘઉંનાં બારદાનમાં યુરિયા ખાતર અને ચણા અને તુવેરની દાળ ભરવામાં આવી હોવાના આક્ષેપો પણ ઉઠ્યા છે. ખાતરના 47 કટ્ટા અંગે ખેતીવાડી વિભાગને રિપોર્ટ કરાયો છે.

મેઘરજ પુરવઠા વિભાગે તપાસ બાદ અહેવાલ જિલ્લા પુરવઠા વિભાગને સોંપ્યો છે. હવે તપાસમાં શું બહાર આવે છે અને જવાબદારો સામે શું કાર્યવાહી થાય છે તેના પર સૌની નજર છે.