સુરતના વરાછામાં વેલ્ડિંગ દરમિયાન ભયાનક આગ, છ ગોડાઉનો બળીને ખાખ થયા

સુરતના મોટા વરાછા વિસ્તારમાં મોડી રાત્રે એક ભયાનક આગ લાગી હતી, જેણે વિસ્તારમાં ભારે હોબાળો મચાવ્યો હતો. ગજેરા કમ્પાઉન્ડ ખાતે આવેલા શ્રી હરિ કેમ્પસના પતરાના શેડમાં વેલ્ડિંગ કામ દરમિયાન અચાનક આગ ભભૂકી ઊઠી હતી.

આગે જોતજોતામાં એટલું વિકરાળ સ્વરૂપ ધારણ કરી લીધું કે તેણે બાજુમાં આવેલા છ જેટલા ગોડાઉનને પોતાની લપેટમાં લઈ લીધા હતા. આગની તીવ્રતાને કારણે આ વિસ્તારમાં ભારે અફરાતફરી મચી ગઈ હતી.

આ દુર્ઘટનામાં ઇવેન્ટ મેનેજમેન્ટનો મોંઘોદાટ સામાન અને કિંમતી સોલાર પેનલો બળીને ખાખ થઈ ગયા હતા. આ આગમાં વેપારીઓને લાખો રૂપિયાનું મોટું આર્થિક નુકસાન વેઠવાનો વારો આવ્યો છે.