સુરતના ઉમરપાડામાં તાપી-કરજણ લિંકની પાઇપલાઇન તૂટી, ખેતરોમાં પાણી ભરાઈ ગયું

સુરત જિલ્લાના ઉમરપાડા તાલુકાના બિલવણ ગામે તાપી-કરજણ લિંક યોજનાની પાઇપલાઇન તૂટી ગઈ છે. ગતરોજ બનેલી આ ઘટનાને કારણે ખેડૂતોના ખેતરોમાં મોટા પ્રમાણમાં પાણી ભરાઈ ગયું હતું. આ સ્થિતિને કારણે ખેતીના કામકાજ પર નોંધપાત્ર અસર પડી છે.

કરોડો રૂપિયાના ખર્ચે તૈયાર થયેલી આ પાઇપલાઇન માત્ર એક જ વર્ષમાં તૂટી પડતાં તેની ગુણવત્તા સામે સવાલો ઉભા થયા છે. સ્થાનિક લોકો દ્વારા કામમાં ભ્રષ્ટાચાર થયો હોવાની પણ ચર્ચાઓ ચાલી રહ્યા છે. ઘટનાની જાણ થતાં જ તંત્ર દ્વારા તાપી-કરજણ લિંક યોજનામાં પાણીનો પ્રવાહ બંધ કરી દેવાયો હતો અને તૂટેલી પાઇપલાઇનનું સમારકામ તરત જ શરૂ કરવામાં આવ્યું છે.

આ ઘટના બાદ ખેડૂતો દ્વારા માંગ કરવામાં આવી છે કે આ ઘટનાની યોગ્ય તપાસ થાય. તેમણે જવાબદારી નક્કી કરવામાં આવે અને ભવિષ્યમાં આવા બનાવો ન બને તે માટે જરૂરી પગલાં લેવા માંગી છે.