કલોલ: મોટી ભોયણની સિંઘલ ઈન્ડસ્ટ્રીઝમાં ભીષણ આગ, ફાયર વિભાગ દ્વારા આગ પર કાબૂ મેળવવાના પ્રયાસો ચાલુ

કલોલ તાલુકાના મોટી ભોયણ ગામમાં આવેલી સિંઘલ ઈન્ડસ્ટ્રીઝ નામની કંપનીમાં આજે ભીષણ આગ લાગવાની ઘટના બની છે. આ કંપની પ્લાસ્ટિક પેકિંગ મટીરિયલ બનાવવાનું કામ કરે છે. આગ લાગવાનું ચોક્કસ કારણ હજુ સુધી જાણી શકાયું નથી, પરંતુ આગે વિકરાળ સ્વરૂપ ધારણ કર્યું હતું.

આગની જાણ થતાં જ ફાયર વિભાગના જવાનો તાત્કાલિક ઘટનાસ્થળે દોડી આવ્યા હતા. સતત બે કલાકથી વધુ સમયથી આગ પર કાબૂ મેળવવાના પ્રયાસો ચાલી રહ્યા છે. આગની ગંભીરતાને ધ્યાનમાં રાખીને, ફાયર વિભાગ દ્વારા મેજર કોલ જાહેર કરવામાં આવ્યો છે.

ઘટનાસ્થળે કડી, કલોલ અને ગાંધીનગર ફાયર વિભાગની અનેક ગાડીઓ પહોંચી ગઈ છે અને આગ બુઝાવવાની કામગીરી પુરજોશમાં ચાલી રહી છે. આ ઘટનામાં કોઈ જાનહાનિ થઈ છે કે કેમ તે અંગેની માહિતી હાલ પ્રાપ્ત થઈ નથી. આગના કારણે થયેલા નુકસાનનો પણ ચોક્કસ આંકડો હજુ બહાર આવ્યો નથી.