શક્તિપીઠ અંબાજીમાં સાતમા નોરતે ભક્તોનો અભૂતપૂર્વ ધસારો, બે મંગળા આરતીનો અનેરો મહિમા

આસો નવરાત્રિના પવિત્ર પર્વ નિમિત્તે ગુજરાતના પ્રસિદ્ધ યાત્રાધામ અંબાજી ખાતે શક્તિપીઠમાં સાતમા નોરતે મા અંબાના દર્શન કરવા માટે દેશભરમાંથી હજારો ભક્તો ઊમટી પડ્યા હતા. વહેલી સવારથી જ અંબાજી મંદિરમાં શ્રદ્ધાળુઓનો ભારે ધસારો જોવા મળ્યો હતો. ભક્તોએ માતાજીના જયઘોષ સાથે મંદિર પરિસરને ગુંજાવી દીધું હતું અને મા અંબાના દર્શન કરી ધન્યતા અનુભવી હતી.

નવરાત્રિના બીજા નોરતાથી લઈને આઠમ સુધી રોજ બે મંગળા આરતી યોજવાની અંબાજી મંદિરની અનોખી પરંપરા છે. આ પરંપરા મુજબ, સાતમા નોરતે પણ સવારે ગર્ભગૃહમાં પ્રથમ મંગળા આરતી અને ઘટસ્થાપના પાસે બીજી મંગળા આરતી ભટ્ટજી મહારાજ દ્વારા કરવામાં આવી હતી. સિદ્ધિવિનાયક મંદિરની આરતી બાદ મા અંબાની આરતીનો પ્રારંભ થતાં સમગ્ર મંદિર પરિસર ભક્તિમય બન્યું હતું.

અંબાજી મંદિરને રંગબેરંગી ફૂલોથી ખૂબ જ સુંદર રીતે શણગારવામાં આવ્યું હતું, જેણે ભક્તોનું ધ્યાન ખેંચ્યું હતું. માતાજીની આરતી દરમિયાન ભક્તોમાં અનેરો ઉત્સાહ જોવા મળ્યો હતો. નવરાત્રિના આ પાવન પર્વે અંબાજી ધામમાં ભક્તિ, આસ્થા અને શ્રદ્ધાનો અવિરત પ્રવાહ જળવાઈ રહ્યો હતો.