ખડાધાર ચેક પોસ્ટ પર બાઈક પર લઈ જવાતો ઈંગ્લિશ દારૂ ઝડપાયો, બે ઈસમો સામે કાર્યવાહી

ખાંભા તાલુકાની ખડાધાર ચેક પોસ્ટ પરથી પોલીસે બાઈક પર ઈંગ્લિશ દારૂની ખેપ મારતા બે ઈસમોને રંગેહાથ ઝડપી પાડ્યા છે. પોલીસમાંથી પ્રાપ્ત માહિતી અનુસાર, મનુભાઈ કાનજીભાઈ વાઘેસી અને ભરતભાઈ ભનુભાઈ ઓઢવીયા નામના બે ઈસમો બાઈક પર દારૂની હેરાફેરી કરી રહ્યા હતા ત્યારે પોલીસે તેમને રોક્યા હતા. તેમની પાસેથી ભારતીય બનાવટના ઈંગ્લિશ દારૂની કુલ ૭૨ બોટલ મળી આવી હતી.

પોલીસે ઝડપાયેલા દારૂ અને બાઈક સહિત કુલ રૂ. ૩૯,૪૮૦ ની કિંમતનો મુદ્દામાલ જપ્ત કર્યો છે. આ મામલે પોલીસે બંને ઈસમો વિરુદ્ધ કાયદેસરની કાર્યવાહી હાથ ધરી છે.

આ ઉપરાંત, અમરેલી જિલ્લામાં અન્ય કાર્યવાહી દરમિયાન પોલીસે ૨૭ ઈસમોને દેશી દારૂ સાથે પકડી પાડ્યા હતા. સાથે જ, ૧૩ ઈસમો પાસ-પરમિટ વગર જાહેર સ્થળોએ કેફી પીણું પીધેલી હાલતમાં રખડતા-ફરતા મળી આવતા તેમની સામે પણ કાયદેસરની કાર્યવાહી કરવામાં આવી હતી.