કલોલ: મોટી ભોયણની સિંઘલ ઈન્ડસ્ટ્રીઝમાં ભીષણ આગ, ફાયર વિભાગના સતત પ્રયાસો

કલોલ નજીક આવેલા મોટી ભોયણ ગામમાં આવેલી સિંઘલ ઈન્ડસ્ટ્રીઝ નામની પ્લાસ્ટિક પેકિંગ મટીરિયલ બનાવતી ફેક્ટરીમાં આજે ભીષણ આગ લાગી હતી. આગ એટલી વિકરાળ હતી કે તેના ધુમાડાના ગોટેગોટા દૂર દૂર સુધી દેખાઈ રહ્યા હતા.

આગ લાગ્યાની જાણ થતાં જ ફાયર વિભાગના કાફલા ઘટનાસ્થળે પહોંચી ગયા હતા. કડી, કલોલ અને ગાંધીનગર ફાયર સ્ટેશનની ગાડીઓ દ્વારા આગ પર કાબૂ મેળવવાના પ્રયાસો સતત બે કલાકથી ચાલી રહ્યા છે. જોકે, આગની જ્વાળાઓ એટલી ઊંચી છે કે તેને કાબૂમાં લેવામાં ફાયર વિભાગને ભારે મુશ્કેલીનો સામનો કરવો પડી રહ્યો છે.

આ ભીષણ આગને પગલે પરિસ્થિતિની ગંભીરતાને ધ્યાનમાં રાખીને મેજર કોલ જાહેર કરવામાં આવ્યો છે. આસપાસના વિસ્તારોમાંથી પણ ફાયર બ્રિગેડની મદદ મંગાવવામાં આવી રહી છે. સદનસીબે, હાલ કોઈ જાનહાનિના સમાચાર નથી, પરંતુ ફેક્ટરીમાં થયેલા નુકસાનનો ચોક્કસ આંકડો આગ પર સંપૂર્ણ કાબૂ મેળવ્યા બાદ જ જાણી શકાશે.