જૂનાગઢ: ઘરનો સામાન બેંગલુરુ મોકલવાના બહાને ૩૮.૧૫ લાખની ઠગાઈ, કાર્ગો સંચાલક સામે ગુનો નોંધાયો

જૂનાગઢના મધુરમ વિસ્તારમાં રહેતા અને પ્રોફેસર તરીકે ફરજ બજાવતા ડૉ. વિદ્યા નારાયણ સાથે કાર્ગો સર્વિસના નામે લાખો રૂપિયાની ઠગાઈ અને ખંડણી માંગવાનો ચોંકાવનારો કિસ્સો સામે આવ્યો છે. આ બનાવ કામનાથ નગર સોસાયટી, આંગન ટાઉનશીપ, મધુરમ, જૂનાગઢ ખાતે બન્યો હતો. આ અંગે 'સી' ડિવીઝન પોલીસ સ્ટેશનમાં ગુનો નોંધવામાં આવ્યો છે.

ફરિયાદી ડૉ. વિદ્યા નારાયણે પોતાના ઘરનો સામાન અને બે ફોરવ્હિલ કાર જૂનાગઢથી બેંગલુરુ મોકલવા માટે 'ફાસ્ટ પ્રોફેશનલ કાર્ગો મોર્સ' નામની કાર્ગો સર્વિસ સાથે રૂ. ૭૫,૫૦૦/- માં સોદો કર્યો હતો. જોકે, આરોપીઓએ સામાન પહોંચાડવાને બદલે અગાઉ નક્કી થયેલ રકમ કરતાં અનેક ગણી વધુ રૂપિયાની માંગણી કરી હતી. આ ઠગાઈની કુલ કિંમત રૂ. ૩૮,૧૫,૦૦૦/- આંકવામાં આવી છે.

આરોપીઓએ શરૂઆતમાં રૂ. ૨,૧૧,૨૧૦/- અને બાદમાં રૂ. ૧,૨૯,૨૮૦/- નું નવું બિલ મોકલીને પેમેન્ટ કરશો તો જ સામાન મળશે તેવી ધમકી આપી હતી. પ્રાથમિક તપાસમાં આરોપીઓએ આપેલા બિલમાં દર્શાવેલ સરનામાં અને જી.એસ.ટી. નંબર પણ ખોટા તથા બંધ હાલતમાં હોવાનું બહાર આવ્યું છે, જે તેમની ઠગાઈની પદ્ધતિ દર્શાવે છે.

આ પ્રકારે અગાઉ નક્કી થયા મુજબનો રૂ. ૩૮,૧૫,૦૦૦/- ની કિંમતનો સામાન અને વાહનો બેંગલુરુ ન પહોંચાડી, ખોટા બિલ બનાવી ખંડણી માંગી ઠગાઈ આચરનાર આરોપીઓ વિરુદ્ધ જૂનાગઢ 'સી' ડિવીઝન પોલીસ સ્ટેશનમાં BNS કલમ ૩૧૮(૪), ૩૩૬(૩), ૩૪૦(૨), ૩૦૮(૨) હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.