માંડવી તાલુકામાં પ્રાકૃતિક ખેતી અને તેલીબિયાં પાકો પર ખેડૂત તાલીમ કાર્યક્રમ યોજાયો

સુરત જિલ્લાના માંડવી તાલુકાના ગોડધા ગામ ખાતે પ્રાકૃતિક ખેતી અને તેલીબિયાં પાકો વિશે એક દિવસીય ખેડૂત તાલીમ કાર્યક્રમ યોજાયો હતો. આ કાર્યક્રમમાં ૫૦થી વધુ ખેડૂતોએ ઉત્સાહભેર ભાગ લીધો હતો.

આ તાલીમ કાર્યક્રમનું આયોજન શ્રી સરદાર પટેલ ઈન્સ્ટિટ્યૂટ ઓફ ડેવલપમેન્ટ, સુરત અને જિલ્લા ખેતીવાડી ખાતું, સુરત દ્વારા સંયુક્ત રીતે કરુણાસાગર પ્રાકૃતિક ફાર્મ એન્ડ નર્સરી ખાતે કરવામાં આવ્યું હતું. આ કાર્યક્રમ પરંપરાગત કૃષિ વિકાસ યોજના (PKVY) અને નેશનલ મિશન ઓન એડિબલ ઓઈલ્સ-ઓઈલસીડ યોજના હેઠળ યોજાયો હતો.

કાર્યક્રમનો મુખ્ય ઉદ્દેશ્ય ખેડૂતોને પ્રાકૃતિક ખેતી પદ્ધતિઓ અપનાવવા અને તેલીબિયાં પાકોના ઉત્પાદનમાં વધારો કરવા માટે માર્ગદર્શન આપવાનો હતો. આ તાલીમ દ્વારા ખેડૂતોને આધુનિક ટેકનિક અને સરકારી યોજનાઓ વિશે પણ માહિતી આપવામાં આવી.