સુરતમાં કાર બંધ પડતાં નવરાત્રિએ ઘરે પરત ફરી રહેલી મહિલાઓને પોલીસે પહોંચાડી સુરક્ષિત રીતે»,

સુરતમાં નવરાત્રિના તહેવાર દરમિયાન મોડી રાત્રે ઘરે પરત ફરી રહેલી ત્રણ મહિલાઓ અચાનક મુશ્કેલીમાં મુકાઈ ગઈ હતી. 14 ઓક્ટોબરની રાત્રે ત્રણેય મહિલાઓ પોતાની કાર લઈને પસાર થઈ રહી હતી, તે દરમિયાન અલથાણ પોલીસ સ્ટેશનની હદમાં અચાનક તેમની ગાડી બગડી ગઈ હતી. મોડી રાતના સમયે નિર્જન માર્ગ પર વાહન ખોટકાઈ જતાં મહિલાઓ ભારે ચિંતામાં મુકાઈ ગઈ હતી.

કોઈપણ જોખમ વિના તાત્કાલિક સહાય મેળવવા માટે તેમણે તરત જ ઇમરજન્સી હેલ્પલાઇન નંબર 112 પર સંપર્ક કર્યો હતો. 112 કંટ્રોલ રૂમનો કોલ મળતાં જ અલથાણ પોલીસ તાત્કાલિક ઘટનાસ્થળે પહોંચી ગઈ હતી. પોલીસે સમયનો બગાડ કર્યા વિના ગણતરીની મિનિટોમાં સ્થળ પર પહોંચી ત્રણેય મહિલાઓને જરૂરી સહાય પૂરી પાડી હતી.

પોલીસે ઘટનાસ્થળે પહોંચી મહિલાઓને હિંમત આપી હતી અને વાહનની સ્થિતિ ચકાસીને તેમને સલામત રીતે તેમના નિવાસસ્થાને પહોંચાડવાની યોગ્ય વ્યવસ્થા કરી આપી હતી. નવરાત્રિ મહોત્સવ દરમિયાન રાત્રિના સમયે મહિલાઓ અને યુવતીઓ નિર્ભય બનીને ફરી શકે અને સુરક્ષિત અનુભવ કરે તે માટે મહિલા સેલના એસીપી મિની જોસેફ દ્વારા પોલીસ વિભાગને ખાસ સૂચનાઓ આપવામાં આવી છે.

અલથાણ પોલીસ દ્વારા રાત્રિના સમયે દાખવવામાં આવેલી આ ત્વરિત સતર્કતા અને માનવીય અભિગમને કારણે મુશ્કેલીમાં મુકાયેલી મહિલાઓએ રાહતનો શ્વાસ લીધો હતો અને પોલીસ તંત્રનો આભાર માન્યો હતો.