સુરતમાં લૂંટના ઈરાદે રેકી કરતા મેરઠના બે શખ્સો હથિયારો સાથે ઝડપાયા

પોલીસે આરોપીઓની પૂછપરછ બાદ બિલ્ડિંગમાંથી ફેંકી દેવાયેલ 1 દેશી કટ્ટો, 2 જીવતા કારતૂસ અને 1 તીક્ષ્ણ ચપ્પુ જપ્ત કર્યું છે. આ કાર્યવાહી સુરત શહેર પોલીસ દ્વારા કરવામાં આવી છે.

પકડાયેલા આરોપીઓમાં મહતાબ અબ્દુલ સલામ, ઉંમર વર્ષ 47 અને રોશન બુન્દુ સેફી, ઉંમર વર્ષ 42, બંને રહેવાસી કાંશી ગામ, મેરઠ, ઉત્તરપ્રદેશનો સમાવેશ થાય છે. તેમની પાસેથી ચોરાયેલા વાહનો પણ કબજે લેવાયા છે.

તપાસમાં સામે આવ્યું કે બંને આરોપીઓ બેકાર છે અને લૂંટના ઈરાદે તેમણે અઠવા તેમજ મહિધરપુરા વિસ્તારમાંથી એક્ટિવા GJ-05-MU-3354 અને મોટરસાયકલ GJ-16-BF-2860 ચોરી કરી હતી. તેઓ સુરતમાં સોનું અથવા મોટી રોકડ લૂંટવાના ઈરાદે રેકી કરતા હતા.