ସୁରକ୍ଷାରେ ତ୍ରୁଟି ଓ ବିଭାଗୀୟ ନିୟମ ଉଲ୍ଲଂଘନ ଅଭିଯୋଗରେ ବାଲେଶ୍ୱର ଜେଲର୍ ସସପେଣ୍ଡ

ବାଲେଶ୍ୱର ଜେଲର୍ ପ୍ରଦୀପ୍ତ କୁମାର ମହାଳିକ କାର୍ଯ୍ୟରେ ଅବହେଳା, ଜେଲ୍‌ ସୁରକ୍ଷାରେ ତ୍ରୁଟି ଓ ବିଭାଗୀୟ ନିୟମ ଉଲ୍ଲଂଘନ ଅଭିଯୋଗରେ ନିଲମ୍ବିତ ହୋଇଛନ୍ତି।
ଜେଲ୍ ଡିଜି ସୁଶାନ୍ତ ନାଥ ପ୍ରାଥମିକ ତଦନ୍ତ ଏବଂ ବିଭାଗୀୟ ରିପୋର୍ଟ ଆଧାରରେ ପ୍ରଦୀପ୍ତ କୁମାର ମହାଳିକଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି।
ତଦନ୍ତରୁ ଜଣାପଡ଼ିଥିବା ସୂଚନା ଅନୁଯାୟୀ, ସମ୍ପୃକ୍ତ ଜେଲ୍ ଅଧିକାରୀଙ୍କ ବିରୋଧରେ ସୁରକ୍ଷା ବ୍ୟବସ୍ଥା ପ୍ରତି ଅବହେଳା, ବିଭାଗୀୟ ନିର୍ଦ୍ଦେଶାବଳୀ ପାଳନ ନକରିବା ଏବଂ ଜେଲ୍‌ର ପ୍ରଶାସନିକ ପରିଚାଳନାରେ ବିଶୃଙ୍ଖଳା ଭଳି ସଙ୍ଗୀନ ଅଭିଯୋଗ ରହିଛି। ନିଲମ୍ବନ ଆଦେଶ ଜାରି ହେବା ପରେ ସମ୍ପୃକ୍ତ ଅଧିକାରୀଙ୍କୁ ପୂର୍ବ ଅନୁମତି ବିନା ନିର୍ଦ୍ଧାରିତ ମୁଖ୍ୟାଳୟ ଛାଡ଼ି ନଯିବାକୁ କଡ଼ା ନିର୍ଦ୍ଦେଶ ଦିଆଯାଇଛି। ଏଥିସହ ଘଟଣାର ଅଧିକ ତଦନ୍ତ ପାଇଁ ଏକ ବ୍ୟାପକ ବିଭାଗୀୟ ତଦନ୍ତ ଆରମ୍ଭ କରାଯାଇଛି।