અમદાવાદના દાણીલીમડામાં ‘નશા મુક્ત દાણીલીમડા, નશા મુક્ત અમદાવાદ’ અભિયાનનો પ્રારંભ

અમદાવાદના દાણીલીમડા વિસ્તારમાં નશાના વધતા દુષણ સામે જાગૃતિ લાવવા માટે એક મહત્વપૂર્ણ અભિયાનની શરૂઆત થવા જઈ રહી છે. દાણીલીમડાના ઈતિહાસમાં પ્રથમ વખત ‘નશા મુક્ત દાણીલીમડા, નશા મુક્ત અમદાવાદ’ના સંકલ્પ સાથે ટૂંક સમયમાં દાણીલીમડા ચાર રસ્તા પરથી મોટા કાર્યક્રમ સાથે આ અભિયાનનો પ્રારંભ કરવામાં આવશે.

દાણીલીમડા વોર્ડના પૂર્વ ઉમેદવાર અશફાક ખાન દ્વારા જણાવવામાં આવ્યું છે કે આ અભિયાનમાં પોલીસ તંત્ર સાથે હાથ મિલાવીને નશામુક્તિ અંગે લોકોમાં જાગૃતિ ફેલાવવામાં આવશે. આ પહેલનો મુખ્ય ઉદ્દેશ્ય યુવાનો અને સમાજના તમામ વર્ગોને નશાના દુષણથી દૂર રહેવા માટે પ્રોત્સાહિત કરવાનો છે.

આ અભિયાન અંતર્ગત દાણીલીમડા વિસ્તારની ગલીઓ, મહોલ્લાઓ, ચાની કીટલીઓ અને સોસાયટીઓમાં જઈને નશાના દુષણથી થતા નુકસાન અંગે લોકોને જાગૃત કરવામાં આવશે. આ ઉપરાંત, ધાર્મિક ગુરુઓ, ધાર્મિક સ્થળોના આગેવાનો, સિવિલ સોસાયટીના પ્રતિનિધિઓ, સામાજિક આગેવાનો, નેતાઓ, કાઉન્સિલરો અને ધારાસભ્ય સહિતના વિવિધ ક્ષેત્રના લોકોને આ અભિયાનમાં જોડીને સહયોગ મેળવવાનો પ્રયાસ કરવામાં આવશે.