માંડવીમાં આદ્યશક્તિ અંબેમાના નવરાત્રી મહોત્સવનો ભવ્ય પ્રારંભ, ધારાસભ્ય અને ભાજપ મહામંત્રી રહ્યા ઉપસ્થિત

માંડવી શહેરમાં આદ્યશક્તિ અંબેમાના નવરાત્રી મહોત્સવનો ભવ્ય પ્રારંભ થયો છે. માંડવી 157 વિધાનસભાના ધારાસભ્ય શ્રી કુંવરજીભાઈ હળપતિના હસ્તે આ મહોત્સવનું ઉદ્ઘાટન કરવામાં આવ્યું હતું. સનાતન હિંદુ શક્તિ સમિતિ દ્વારા માંડવી હાઈસ્કૂલના ગ્રાઉન્ડ પર આ આયોજન કરવામાં આવ્યું છે, જે શહેરભરના ભક્તો માટે આકર્ષણનું કેન્દ્ર બન્યું છે.

આ શુભ પ્રસંગે ગુજરાત પ્રદેશ ભાજપ મહામંત્રી શ્રી રત્નાકરજી મુખ્ય અતિથિ તરીકે ઉપસ્થિત રહ્યા હતા. તેમણે દીપ પ્રાગટ્ય કરી અને આરતી ઉતારીને નવરાત્રી મહોત્સવનો શુભારંભ કરાવ્યો હતો. તેમના આગમનથી કાર્યક્રમને વધુ ગૌરવ પ્રાપ્ત થયું હતું.

નવરાત્રી મહોત્સવના પ્રારંભ નિમિત્તે મોટી સંખ્યામાં સ્થાનિક નાગરિકો અને ભક્તો ઉપસ્થિત રહ્યા હતા. સર્વેએ સાથે મળીને માતાજીની આરતીમાં ભાગ લીધો હતો અને નવરાત્રિના પાવન પર્વની શરૂઆતની ઉજવણી કરી હતી. આયોજકો દ્વારા ઉત્સાહપૂર્ણ વાતાવરણ વચ્ચે કાર્યક્રમ સંપન્ન થયો હતો.