ભરૂચમાં ડ્રાઇવિંગ સ્કૂલની કારે એક્ટિવાચાલક મહિલાને ટક્કર મારતાં ગંભીર ઈજા

ભરૂચ શહેરના ભૃગુઋષિ બ્રિજ પર આજે એક ગંભીર હિટ એન્ડ રનનો બનાવ સામે આવ્યો છે. પ્રાથમિક માહિતી અનુસાર, એક ડ્રાઇવિંગ સ્કૂલના વાહને એક્ટિવા પર સવાર એક મહિલાને જોરદાર ટક્કર મારી હતી. આ અકસ્માત સર્જ્યા બાદ કારચાલક ઘટનાસ્થળેથી ફરાર થઈ ગયો હતો.

આ ટક્કર એટલી જોરદાર હતી કે એક્ટિવાચાલક મહિલા રસ્તા પર પટકાતાં ગંભીર રીતે ઇજાગ્રસ્ત થયાં હતાં. બનાવની જાણ થતાં જ બ્રિજ પરથી પસાર થઈ રહેલા રાહદારીઓ તાત્કાલિક મદદ માટે દોડી આવ્યા હતા.

સ્થાનિક લોકોએ તાત્કાલિક ધોરણે ઇજાગ્રસ્ત મહિલાને સારવાર માટે નજીકની હોસ્પિટલમાં ખસેડવાની વ્યવસ્થા કરી હતી. આ ઘટના બાદ ભૃગુઋષિ બ્રિજ પર થોડા સમય માટે વાહનવ્યવહાર ખોરવાયો હતો.