ભાવનગર એલસીબીએ ગાયત્રી મંદિર નજીક જુગાર રમતા સાત ઈસમોને રૂ. ૩૩,૬૦૦ રોકડા અને અન્ય મુદ્દામાલ સાથે ઝડપી પાડ્યા

ભાવનગર રેન્જના પોલીસ મહાનિરીક્ષક શ્રી રાજેન્દ્ર વી. અસારી અને ભાવનગરના પોલીસ અધિક્ષક શ્રી નિતેશ પાંડેયની સૂચના અનુસાર, ભાવનગર લોકલ ક્રાઇમ બ્રાન્ચ (એલસીબી) દ્વારા શહેર અને ગ્રામ્ય વિસ્તારોમાં દારૂ અને જુગારની પ્રવૃત્તિઓ પર અસરકારક કાર્યવાહી કરવામાં આવી રહી છે.

આ કાર્યવાહીના ભાગરૂપે, તા. ૧૨/૧૦/૨૦૨૬ ના રોજ એલસીબી સ્ટાફ મહુવા ટાઉન પોલીસ સ્ટેશન વિસ્તારમાં નવરાત્રી મહોત્સવ દરમિયાન પેટ્રોલીંગમાં હતો. તે દરમિયાન બાતમી મળી હતી કે ગાયત્રી મંદિર નજીક આવેલ ઝુપડપટ્ટીમાં અશોકભાઈ રતીભાઈના રહેણાંક મકાનની બહાર જાહેરમાં કેટલાક ઈસમો ગંજીપાના અને પૈસા વડે તીનપત્તીનો જુગાર રમી રહ્યા છે.

આ બાતમીના આધારે રેઇડ કરતાં, પોલીસે કિશોરભાઈ ઉર્ફે કાળુભાઈ પુનાભાઈ ભીલ, ધીરૂભાઈ વાધાભાઈ ગુજરીયા, લાલો હમીરભાઈ પરમાર, નીતીનભાઈ રઘુભાઈ વાળા, અશોકભાઈ રતિભાઈ ચુડાસમા, રાજુભાઈ મોહનભાઈ બાંભણીયા અને ભાવેશભાઈ કાળુભાઈ ચુડાસમા નામના સાત ઈસમોને જુગાર રમતા ઝડપી પાડ્યા હતા. તેમની પાસેથી ગંજીપાનાના પત્તા અને રોકડા રૂ. ૩૩,૬૦૦/- કબજે કરવામાં આવ્યા હતા.

આ ઉપરાંત, પોલીસે તેમની પાસેથી ૬ મોબાઈલ જેની કિંમત આશરે રૂ. ૫૦,૦૦૦/- અને ૨ મોટર સાયકલ જેની કિંમત આશરે રૂ. ૧,૦૦,૦૦૦/- મળી કુલ રૂ. ૧,૮૩,૬૦૦/- નો મુદ્દામાલ કબજે કર્યો છે. આ તમામ આરોપીઓ વિરુદ્ધ મહુવા ટાઉન પોલીસ સ્ટેશનમાં જુગાર પ્રતિબંધક અધિનિયમની કલમો હેઠળ ગુનો દાખલ કરવામાં આવ્યો છે. આ કામગીરી પોલીસ ઇન્સ્પેક્ટર શ્રી એચ.બી. ચૌહાણના માર્ગદર્શન હેઠળ કરવામાં આવી હતી.