પલસાણા નજીક હાઈવે પર ટેમ્પો પલટી જતાં શ્રમજીવીનું મોત

સુરત જિલ્લાના પલસાણા તાલુકાના બલેશ્વર ગામ પાસે નેશનલ હાઈવે પર એક ગમખ્વાર અકસ્માત સર્જાયો છે. પ્રાપ્ત માહિતી અનુસાર, રસ્તો ઓળંગી રહેલા એક શ્રમજીવીને બચાવવાના પ્રયાસમાં એક ટેમ્પો ચાલકે પોતાનો કાબૂ ગુમાવ્યો હતો.

આ ઘટનામાં પાણીની બોટલો ભરેલો ટેમ્પો રોડ પર પલટી ખાઈ ગયો હતો. ટેમ્પો પલટી ખાતાની સાથે જ તેની નીચે આવી જવાથી રસ્તો ઓળંગી રહેલા શ્રમજીવીનું ઘટનાસ્થળે જ કમકમાટીભર્યું મોત નીપજ્યું હતું.

આ અકસ્માતને કારણે હાઈવે પર વાહનવ્યવહાર થોડા સમય માટે ખોરવાયો હતો. સ્થાનિક લોકો અને પોલીસ ઘટનાસ્થળે પહોંચી ગયા હતા અને પરિસ્થિતિને કાબૂમાં લીધી હતી. મૃતક શ્રમજીવીની ઓળખ અંગે વધુ તપાસ હાથ ધરવામાં આવી રહી છે.