ખંભાતમાં નવી ગટર લાઈન ઉભરાતા રહીશો અને વાહનચાલકો પરેશાન

આણંદ જિલ્લાના ખંભાત શહેરમાં કતકપૂર ગેસ ગોડાઉન નજીક નવી નાખવામાં આવેલી ગટર લાઈન ઉભરાવાની સમસ્યા સર્જાઈ છે. આ કારણે સ્થાનિક રહીશો, વાહનચાલકો અને શાળા-કોલેજમાં અભ્યાસ કરતા વિદ્યાર્થીઓને દૈનિક જીવનમાં ભારે હાલાકી વેઠવી પડી રહી છે.

ગટર લાઈન માંથી નીકળતું ગંદુ પાણી રસ્તા પર ભરાઈ રહેતા વાહનચાલકોને પસાર થવામાં મુશ્કેલી પડે છે. ખાસ કરીને વિદ્યાર્થીઓને શાળા-કોલેજ પહોંચવા માટે આ પાણીમાંથી પસાર થવું પડે છે, જેના કારણે તેમના કપડાં ગંદા થાય છે અને તેમને અસુવિધા થાય છે.

સ્થાનિક રહીશો દ્વારા આ સમસ્યા અંગે વારંવાર રજૂઆતો કરવામાં આવી હોવા છતાં તંત્ર દ્વારા હજુ સુધી કોઈ નક્કર કાર્યવાહી કરવામાં આવી નથી. ગટર લાઈન ઉભરાવાની સમસ્યાના કારણે વિસ્તારમાં ગંદકી અને દુર્ગંધ ફેલાઈ રહી છે, જે આરોગ્ય માટે પણ જોખમી બની શકે છે.