નવરાત્રિનો પ્રારંભ: પ્રથમ દિવસે મા શૈલપુત્રીની ભક્તિભાવપૂર્વક પૂજા..

હિન્દુ ધર્મનો પવિત્ર તહેવાર નવરાત્રિનો પ્રારંભ થયો છે, જે દેવી દુર્ગાના નવ સ્વરૂપોની આરાધનાનો સમય છે. નવરાત્રિના પ્રથમ દિવસે દેવી શૈલપુત્રીની પૂજા કરવામાં આવે છે. માતા શૈલપુત્રી, જે મસ્તક પર અર્ધચંદ્ર ધારણ કરે છે અને વૃષભ પર બિરાજમાન છે, તેમની ભક્તિ કરવાથી ભક્તોના જીવનમાં સુખ,શાંતિ અને સમૃદ્ધિનો સંચાર થાય છે..

આ શુભ અવસરે ભક્તો માતા અંબાને પ્રાર્થના કરી રહ્યા છે કે તેઓ સૌના ઘરમાં સુખ, શાંતિ અને સમૃદ્ધિ લઈને આવે. નવરાત્રિ દરમિયાન, દેશભરમાં વિવિધ મંદિરોમાં અને ઘરોમાં માતાજીની ભક્તિ અને ઉપાસના કરવામાં આવશે..

માતા શૈલપુત્રીને 'પર્વતની પુત્રી' તરીકે પણ ઓળખવામાં આવે છે અને તેમને શક્તિનું પ્રથમ સ્વરૂપ માનવામાં આવે છે. તેમની પૂજા કરવાથી ભક્તોને આધ્યાત્મિક શક્તિ અને મનોબળ પ્રાપ્ત થાય છે. આ પવિત્ર દિવસ પર, 'જય અંબે'ના નાદ સાથે ભક્તો માતાજીની કૃપા મેળવવા માટે પ્રાર્થના કરી રહ્યા છે.