મધ્યપ્રદેશની પરિણીતાએ બાબરા નજીક વાડીએ ઝેરી દવા પી લેતા મોત

બાબરા તાલુકાના લુણકી ગામે આવેલી એક વાડીમાં મધ્યપ્રદેશ રાજ્યની એક પરિણીતાએ ઝેરી દવા પી લેતા તેનું દુઃખદ અવસાન થયું છે. આ ઘટનાએ સ્થાનિક વિસ્તારમાં ચકચાર જગાવી છે.

મળતી માહિતી મુજબ, મૃતક પરિણીતા જૂનાબેન દિનેશભાઈ બઘેલ (ઉંમર ૨૪) મૂળ મધ્યપ્રદેશના જોબટ તાલુકાના બયડા ફળિયા ગામના વતની હતા અને હાલ તેઓ તેમના પતિ દિનેશભાઈ હેમંતભાઈ બઘેલ (ઉંમર ૩૦) સાથે લુણકી ગામે રહેતા હતા. બનાવ અંગે દિનેશભાઈએ પોલીસમાં જણાવ્યું હતું કે, રાત્રિ ભોજન બાદ તેઓ તેમના મિત્રની વાડીએ બેસવા માટે ગયા હતા.

પોતાના પતિ મિત્રની વાડીએ જતા હોવાનું જૂનાબેનને પસંદ ન આવતાં તેમણે મનમાં લાગી આવતા પોતાની મેળે ખેતીના પાકમાં છાંટવાની ઝેરી દવા પી લીધી હતી. જેના કારણે તેમનું ઘટના સ્થળે જ મોત નીપજ્યું હતું.

આ દુઃખદ બનાવ સંદર્ભે બાબરા પોલીસ સ્ટેશનના એ.એસ.આઈ. વાય.એચ. ડેરે વધુ તપાસ હાથ ધરી છે અને મૃતદેહનું પોસ્ટમોર્ટમ કરાવવાની તજવીજ હાથ ધરવામાં આવી છે.