સુરતમાં મહાનગરપાલિકાની બેદરકારી: ડિવાઈડરના ઝાડ કટિંગનો કચરો રોડ પર ફેંકાયો, વાહનચાલકો પરેશાન

સુરત મહાનગરપાલિકા દ્વારા કરવામાં આવેલ ઝાડ કટીંગની કામગીરી બાદ તેનો કચરો રોડ પર જ છોડી દેવામાં આવતા શહેરીજનો પરેશાન થઈ રહ્યા છે. યુનિક હોસ્પિટલથી સિવિલ ચાર રસ્તા સુધીના મુખ્ય માર્ગ પર ડિવાઈડરમાંથી કાપવામાં આવેલા ઝાડના ડાળખા અને અન્ય કચરો રોડ પર વેરવિખેર પડ્યો છે.

આ કચરાને કારણે વાહનચાલકોને અવરજવરમાં ભારે મુશ્કેલીનો સામનો કરવો પડી રહ્યો છે. ખાસ કરીને સાંજના સમયે અને રાત્રિ દરમિયાન જ્યારે રોશની ઓછી હોય છે, ત્યારે આ કચરો અકસ્માત નોતરી શકે છે. મહાનગરપાલિકા દ્વારા સફાઈ કામગીરીમાં આ પ્રકારની બેદરકારી ચલાવી લેવાય તેમ નથી, તેમ સ્થાનિકોનું કહેવું છે.

મહાનગરપાલિકાના અધિકારીઓ દ્વારા આ બાબતે તાત્કાલિક ધ્યાન આપીને રોડ પર પડેલા કચરાને દૂર કરવામાં આવે અને ભવિષ્યમાં આવી ઘટનાઓ ન બને તેની તકેદારી રાખવામાં આવે તેવી માંગણી ઉઠી રહી છે. આ કચરાના નિકાલની યોગ્ય વ્યવસ્થા ન હોવાને કારણે પણ આવી સમસ્યાઓ સર્જાતી હોવાનું જણાય છે.