ભરૂચ પોલીસે ઘરફોડ ચોરી કરતી સીકલીગર ગેંગના બે સભ્યોને ઝડપી પાડ્યા

ભરૂચ શહેર ‘એ’ ડિવિઝન પોલીસે શહેરના જલારામધામ સોસાયટી અને સોનતલાવડી વિસ્તારમાં થયેલી ઘરફોડ ચોરીના ગુનાઓનો સફળતાપૂર્વક ભેદ ઉકેલી કાઢ્યો છે. પોલીસે આ ગુનાઓમાં સંડોવાયેલા સીકલીગર ગેંગના બે સભ્યોને ઝડપી પાડ્યા છે.

પોલીસે આ ગુનાનો ભેદ ઉકેલવા માટે સઘન તપાસ હાથ ધરી હતી. જેમાં 100થી વધુ CCTV ફૂટેજનું ઝીણવટપૂર્વક વિશ્લેષણ કરવામાં આવ્યું હતું. આ ઉપરાંત, RTOના 700થી વધુ વાહનોના ડેટાનું પણ એનાલિસિસ કરવામાં આવ્યું હતું. આ તપાસ દરમિયાન, ચોરીમાં વપરાયેલી હોન્ડા સાઇન મોટરસાઇકલ પોલીસના હાથે લાગી હતી.

આ મોટરસાઇકલના આધારે પોલીસે સીકલીગર ગેંગના સભ્યો સતવનસિંગ ઉર્ફે ઇલુ પ્રિતમસિંગ સીકલીગર અને જસપાલસિંગ ચેનસિંગ સીકલીગરને ઝડપી પાડ્યા હતા. આ ઝડતી બાદ પોલીસે ચોરીના ગુનાઓમાં વધુ તપાસ હાથ ધરી છે.