વાંસદાના વણારસી ગામે ગ્રામસભામાં પ્રાથમિક સુવિધાઓનો અભાવ, ગ્રામજનોને ઊભા રહીને રજૂઆતો કરવી પડી

વાંસદા તાલુકાના વણારસી ગામે ગાંધી જયંતીના દિવસે યોજાયેલી ગ્રામસભામાં પ્રાથમિક સુવિધાઓના અભાવનો મુદ્દો ચર્ચામાં આવ્યો હતો. ગ્રામજનોની હાજરી વચ્ચે યોજાયેલી આ સભામાં ઉપસ્થિત લોકો માટે બેસવાની પૂરતી વ્યવસ્થા કરવામાં આવી ન હતી, જેના કારણે અનેક યુવાનો અને આગેવાનોને ઊભા રહીને પોતાની રજૂઆતો કરવી પડી હતી.

ગ્રામસભાના સભા હોલમાં ખુરશીઓ અને પાથરણાંની વ્યવસ્થા નહિવત હોવાથી ગામના અનેક યુવાનોને ઊભા રહીને પોતાની રજૂઆતો કરવી પડી હતી. બેસવાની જગ્યા પૂરતી ન હોવાથી ગામના કેટલાક આગેવાનો અને પ્રતિષ્ઠિત વ્યક્તિઓને પણ સભા હોલની બહાર ઊભા રહેવાની ફરજ પડી હતી. આ ઉપરાંત, ગ્રામસભા દરમિયાન લોકો માટે પીવાના પાણીની સુવિધા પણ ઉપલબ્ધ ન હોવાનું સામે આવ્યું હતું.

એક તરફ ગ્રામજનો પોતાની સમસ્યાઓ અને ગામના વિકાસના પ્રશ્નો રજૂ કરવા માટે ગ્રામસભામાં પહોંચ્યા હતા, ત્યારે બીજી તરફ સભા સ્થળે જ જરૂરી પ્રાથમિક વ્યવસ્થાઓના અભાવે લોકોમાં ભારે ચર્ચા અને નારાજગી જોવા મળી હતી. ગામના વિકાસના પ્રશ્નો અંગે ચર્ચા કરવા યોજાતી ગ્રામસભામાં જ બેસવાની અને પીવાના પાણી જેવી મૂળભૂત વ્યવસ્થાનો અભાવ જોવા મળતાં ગ્રામસભાની વ્યવસ્થા સામે ગંભીર સવાલો ઊઠ્યા હતા.

ગ્રામસભા દરમિયાન ગ્રામજનોએ ગામના વિવિધ વિસ્તારોના રસ્તાઓના કામો અંગે રજૂઆતો કરી હતી. આ રજૂઆતો અંગે રસ્તાના કામોની નોંધ લેવામાં આવી હોવાનું ઉપસ્થિત તલાટી-કમ-મંત્રીએ જણાવ્યું હતું. જોકે, ગ્રામસભાના આયોજન અને વ્યવસ્થાપન સામે ગ્રામજનોમાં ભારે અસંતોષ પ્રવર્તી રહ્યો હતો.