બોટાદના નાની વાવડી ગામમાં કપાસના પાકમાં સુકારો: હજારો વીઘાનો પાક નાશ, ખેડૂતો વળતરની માંગ સાથે સરકાર સમક્ષ

બોટાદ જિલ્લાના રાણપુર તાલુકાના નાની વાવડી ગામમાં ખેડૂતો પર આફતનો પહાડ તૂટી પડ્યો છે. વરસાદ બાદ અચાનક કપાસના પાકમાં સુકારો આવતા હજારો વીઘામાં ઉભો પાક બળીને ખાખ થઈ ગયો છે. જેના કારણે ખેડૂતોની વર્ષોની મહેનત પર પાણી ફરી વળ્યું છે. ગામના અનેક ખેડૂતો, જેમાં પ્રતાપસિંહ ડોડીયા, સરદારસિંહ ડોડીયા, રણજીતસિંહ ડોડીયા અને મૂળજીભાઈ ભરવાડ જેવા ખેડૂતો પણ સામેલ છે, તેઓ ભારે ચિંતામાં મુકાયા છે.

પ્રાપ્ત માહિતી અનુસાર, નાની વાવડી ગામમાં કુલ આશરે 10 હજાર વીઘા જમીન છે, જેમાંથી 90 ટકા વિસ્તારમાં કપાસનું વાવેતર કરવામાં આવ્યું હતું. ખેડૂતોએ પ્રતિ વીઘા દીઠ 15 થી 17 હજાર રૂપિયાનો ખર્ચ કર્યો હતો. જોકે, પાકમાં સુકારો આવતા 5 હજાર વીઘાથી વધુ વિસ્તારમાં પાકને મોટું નુકસાન થયું છે. ઘણા ખેતરોમાં તો 90 ટકાથી વધુ કપાસનો પાક સુકાઈ ગયો છે, જેના કારણે ખેડૂતોને ભારે આર્થિક નુકસાન થયું છે.

પાક નિષ્ફળ જતાં ખેડૂતોની હાલત અત્યંત દયનીય બની છે. પરિવારનું ગુજરાન ચલાવવું અને ખેતી માટે લીધેલું દેવું કેવી રીતે ચૂકવવું તે અંગે તેઓ ચિંતિત છે. આ કપરી પરિસ્થિતિમાં, નાની વાવડી ગામના ખેડૂતોએ સરકાર પાસે તાત્કાલિક ધોરણે સર્વે કરાવીને યોગ્ય વળતર અને રાહત પેકેજ જાહેર કરવાની માંગ કરી છે, જેથી તેઓ ફરીથી ઊભા થઈ શકે.