દાહોદ સબ જેલમાં વ્યસનમુક્તિ અને અહિંસા પરમો ધર્મ કાર્યક્રમ યોજાયો

દાહોદ સબ જેલમાં વ્યસનમુક્તિ અને 'અહિંસા પરમો ધર્મ'ની થીમ પર એક વિશેષ કાર્યક્રમ યોજાયો હતો. આ કાર્યક્રમનો મુખ્ય ઉદ્દેશ્ય કેદીઓને વ્યસનમુક્તિ માટે પ્રેરણા આપવાનો અને અહિંસાના માર્ગે ચાલવા માટે પ્રોત્સાહિત કરવાનો હતો.

કાર્યક્રમ દરમિયાન, જેલ પરિસરમાં કેદીઓએ મહાત્મા ગાંધીજીની પ્રતિમા સાથે શાંતિપૂર્ણ અહિંસા યાત્રા કાઢી હતી. એક કેદીએ ગાંધીજીનો વેશ ધારણ કરીને યાત્રાની આગેવાની કરી હતી, જે આકર્ષણનું કેન્દ્ર બન્યું હતું. આ પ્રતીકાત્મક યાત્રા દ્વારા અહિંસાના સંદેશને બુલંદ કરવામાં આવ્યો.

જેલ અધિક્ષક એમ.એલ. ગમારાએ ગાંધીજીની પ્રતિમાને સૂતરની આંટી અર્પણ કરી શ્રદ્ધાંજલિ આપી હતી. તેમણે કેદીઓને સંબોધતા ગાંધીજીના જીવનમૂલ્યો અપનાવીને વ્યસનમુક્ત જીવન જીવવા માટે પ્રેરણા આપી હતી. આ કાર્યક્રમ કેદીઓમાં સકારાત્મક પરિવર્તન લાવવામાં મદદરૂપ થશે તેવી આશા વ્યક્ત કરવામાં આવી.