માલપુરના ઉભરાણ સ્થિત શૂલપાણેશ્વર મંદિરમાંથી ગાંજાનો જથ્થો ઝડપાયો, ચાર સામે ગુનો દાખલ

માલપુર તાલુકાના ઉભરાણ ગામ ખાતે આવેલા શૂલપાણેશ્વર મંદિરમાંથી પોલીસે મોટી માત્રામાં ગાંજાનો જથ્થો ઝડપી પાડ્યો છે. પોલીસને મળેલી બાતમી અને અરજીના આધારે મંદિર પરિસરમાં રેડ કરવામાં આવી હતી. આ રેડ દરમિયાન, પોલીસને 6 લીલા ગાંજાના છોડ મળી આવ્યા હતા, જેની સાથે કુલ 11.397 કિલો ગાંજો પણ મળી આવ્યો હતો.

આ સમગ્ર મુદ્દામાલની કિંમત આશરે ₹5.69 લાખ રૂપિયા આંકવામાં આવી છે. પોલીસે આ મામલે તાત્કાલિક કાર્યવાહી હાથ ધરીને મંદિરના વહીવટકર્તા સહિત કુલ ચાર લોકો સામે ગુનો દાખલ કર્યો છે. આ કાર્યવાહીથી સ્થાનિક વિસ્તારમાં ભારે ચકચાર મચી જવા પામી છે.

પોલીસે ઝડપાયેલા ગાંજાના જથ્થા અને અન્ય મુદ્દામાલને કબજે લીધો છે. ત્રણ આરોપીઓ સામે NDPS એક્ટ હેઠળ કાયદેસરની કાર્યવાહી કરવામાં આવી રહી છે, જ્યારે ચોથા આરોપીને પોલીસે વોન્ટેડ જાહેર કર્યો છે અને તેને ઝડપી પાડવા માટે શોધખોળ શરૂ કરી છે. આ ઘટનાએ મંદિરમાં આવા ગેરકાયદે પ્રવૃત્તિઓ અંગે અનેક સવાલો ઉભા કર્યા છે.