માલપુરના ઉભરાણ મંદિરમાં ગાંજાનો જથ્થો ઝડપાયો, વહીવટકર્તા સહિત ચાર સામે ગુનો

માલપુર તાલુકાના ઉભરાણ ગામમાં આવેલા શૂલપાણેશ્વર મંદિરમાંથી પોલીસે મોટી માત્રામાં ગાંજો ઝડપી પાડ્યો છે. પોલીસને મળેલી બાતમી અને અરજીના આધારે મંદિરમાં રેડ કરવામાં આવી હતી. તપાસ દરમિયાન, પોલીસને 6 લીલા ગાંજાના છોડ અને કુલ 11.397 કિલો ગાંજો મળી આવ્યો હતો.

આ સમગ્ર મુદ્દામાલની કિંમત આશરે ₹5.69 લાખ રૂપિયા આંકવામાં આવી છે. પોલીસે આ બનાવ અંગે મંદિરના વહીવટકર્તા સહિત ચાર વ્યક્તિઓ સામે ગુનો નોંધી કાયદેસરની કાર્યવાહી હાથ ધરી છે. આ કાર્યવાહીમાં ત્રણ આરોપીઓ સામે NDPS એક્ટ હેઠળ ગુનો દાખલ કરવામાં આવ્યો છે, જ્યારે એક આરોપીને વોન્ટેડ જાહેર કરી તેની શોધખોળ શરૂ કરવામાં આવી છે.

પોલીસ દ્વારા આ ગાંજાના જથ્થાના સ્ત્રોત અને તેના વેચાણ અંગેની તપાસ કરવામાં આવી રહી છે. સ્થાનિક વિસ્તારમાં આ ઘટનાને પગલે ચકચાર મચી જવા પામી છે.