લાઠીનું શ્રી મહાકાળી નાટ્ય મંડળ: નવરાત્રિમાં પૌરાણિક નાટકો ભજવી પશુ-પક્ષીઓની સેવા

અમરેલી જિલ્લાના લાઠી તાલુકામાં લુવારીયા દરવાજા પાસે આવેલું શ્રી મહાકાળી નાટ્ય મંડળ વર્ષોથી પરંપરાગત રીતે નવરાત્રિના દસે દસ દિવસ વિવિધ ઐતિહાસિક અને વીર પુરુષોના જીવન પર આધારિત નાટકો ભજવી રહ્યું છે. આ નાટકો દેશ માટે બલિદાન આપનાર વીરોને ઉજાગર કરે છે.

આ નાટકોની તૈયારી અને ભજવણીમાં ઓછામાં ઓછા 50 થી 60 લોકોનું ગ્રુપ જોડાયેલું રહે છે. દરરોજ એક અલગ નાટક ભજવવામાં આવે છે. આ ગ્રુપની વિશેષતા એ છે કે નાટકો દરમિયાન મળતું તમામ દાન અબોલ પશુ-પક્ષીઓના ઘાસચારા અને દાણા માટે વાપરવામાં આવે છે.

આટલા દિવસો સુધી મહેનત કરતું આ ગ્રુપ અન્ય કોઈ પણ પ્રકારના નાણાકીય લાભ લેતું નથી. નવરાત્રિના દસે દસ દિવસ યોજાતા આ નાટકોને નિહાળવા માટે રસ ધરાવતા લોકો યુટ્યુબ પર 'શ્રી મહાકાળી નાટ્ય મંડળ લાઠી' સર્ચ કરીને કાર્યક્રમ જોઈ શકે છે.