અબડાસા: કોઠારા-ભેદીમાં ૪૦૦ એકર ગૌચર જમીન પરથી ૧૫ ઈસમોના ગેરકાયદેસર દબાણો દૂર કરાયા

અબડાસા તાલુકાના કોઠારા અને ભેદી ગામની સીમમાં આવેલી ગૌચર જમીન પર થયેલા ગેરકાયદેસર દબાણોને દૂર કરવાની કાર્યવાહી હાથ ધરવામાં આવી છે. પોલીસ અને વહીવટી તંત્રની સંયુક્ત કામગીરી દ્વારા કુલ ૪૦૦ એકર જેટલી ગૌચર જમીનને દબાણમુક્ત કરવામાં આવી છે. આ દબાણમુક્ત કરાયેલી જમીનની અંદાજિત કિંમત રૂ. ૧.૨૦ કરોડ રૂપિયા આંકવામાં આવી છે.

આ કાર્યવાહીમાં કુલ ૧૫ ઈસમો સામે પગલાં લેવાયા છે. દબાણ કરનાર ઈસમોમાં હેમભા સુમરાજી ધલ, કેશુભા નવુભા સોઢા, નવુભા તેજમલજી ધલ, સામતજી તેજમલજી ધલ, ફતેસંગજી તેજમલજી ધલ, ઉકાજી તેજમલજી ધલ, સુરુભા તેજમલજી ધલ, પનુભા તેજમલજી ધલ, હરીભા જવણજી સોઢા, રામસંગજી ડુજાજી ધલ, ભરતસિંહ સતુભા ધલ, કરમજી ઉકાજી ધલ, નોંધણજી ઉકાજી ધલ, ખાનજી બારજ અને નરેન્દ્રસિંહ પચાણ સોઢાનો સમાવેશ થાય છે.

મળતી માહિતી અનુસાર, દબાણ કરનાર તમામ ઈસમો ભેદી ગામના રહેવાસી હોવાનું જાણવા મળ્યું છે. વહીવટી તંત્ર દ્વારા ગૌચર જમીનો પરના દબાણોને હટાવવાની આ કાર્યવાહી ભવિષ્યમાં પણ ચાલુ રાખવામાં આવશે તેવી અપેક્ષા છે.