અમદાવાદ પોલીસ દ્વારા 'નશામુક્ત અમદાવાદ'ના સંદેશ સાથે વિશાળ વોકેથોનનું આયોજન

ગાંધી જયંતિના પવિત્ર અવસરે, સાબરમતી આશ્રમ ખાતેથી અમદાવાદ શહેર પોલીસ દ્વારા ‘નશામુક્ત અમદાવાદ’ના સંદેશ સાથે એક વિશાળ વોકેથોનનું આયોજન કરવામાં આવ્યું હતું.

આ કાર્યક્રમમાં પોલીસ કમિશનર અનુપમ ગેહલોત ઉપસ્થિત રહ્યા હતા. તેમના માર્ગદર્શન હેઠળ યોજાયેલી આ વોકેથોનમાં બાળકો, યુવાનો, NCC કેડેટ્સ તેમજ મોટી સંખ્યામાં શહેરના નાગરિકોએ ઉત્સાહભેર ભાગ લીધો હતો અને નશાખોરી વિરુદ્ધ જાગૃતિ ફેલાવી હતી.

પોલીસ કમિશનરના જણાવ્યા અનુસાર, ચાલુ વર્ષ દરમિયાન અમદાવાદ પોલીસે ડ્રગ્સ અને નશીલા પદાર્થોના વેચાણ અને દુરુપયોગ સામે કડક કાર્યવાહી કરી છે. આ કાર્યવાહીના ભાગરૂપે, પોલીસે આશરે ₹31 કરોડની કિંમતનો નશીલો મુદ્દામાલ ઝડપી પાડ્યો છે, જે શહેરને નશામુક્ત બનાવવાના પોલીસના પ્રયાસોને દર્શાવે છે.