ઈ-ચલાણ નહીં ભરનારા વાહનચાલકો સાવધાન: વાહન જપ્ત થશે અને ઓનલાઈન સેવાઓ બંધ

સુપ્રીમ કોર્ટના કડક નિર્દેશોને પગલે, દેશભરમાં બાકી ઈ-ચલાણની વસૂલાત માટે કાર્યવાહી તેજ બની છે. રાજ્ય અને કેન્દ્રશાસિત પ્રદેશોને આ અંગે સૂચનાઓ આપવામાં આવી છે. જે વાહનચાલકો દ્વારા ઈ-ચલાણની રકમ ચૂકવવામાં આવી નથી, ત્યાં સુધી તેમના વાહનોની નોંધણી (રજીસ્ટ્રેશન), ફિટનેસ, પરમિટ અને ટ્રાન્સફર જેવી તમામ ઓનલાઈન સેવાઓ બંધ કરી દેવામાં આવશે.

આ ઉપરાંત, આવા વાહનોને પરિવહન પોર્ટલ પર બ્લેકલિસ્ટ કરવામાં આવશે. એટલું જ નહીં, વાહનોના ફિટનેસ અને પ્રદૂષણ પ્રમાણપત્ર પણ ઈશ્યુ કરવામાં આવશે નહીં. વારંવાર ટ્રાફિક નિયમોનું ઉલ્લંઘન કરનારાઓના ડ્રાઇવિંગ લાઇસન્સના રિન્યુઅલ પર પણ રોક લગાવવામાં આવી શકે છે.

દેશભરમાં આશરે 49 હજાર કરોડ રૂપિયાના ઈ-ચલાણની રકમ હજુ પણ બાકી છે. ગુજરાત રાજ્યમાં પણ પરિસ્થિતિ ચિંતાજનક છે, જ્યાં ટ્રાફિક ચલાણ પેટે 1,608 કરોડ રૂપિયા ભરવાના બાકી છે. ખાસ કરીને, 2025માં સૌથી વધુ ચલાણ જનરેટ થયા બાદ કરોડો રૂપિયાની રકમ હજુ પણ વસૂલવાની બાકી છે.

બાકી ઈ-ચલાણની વસૂલાત માટે તંત્ર દ્વારા હવે કડક પગલાં ભરવામાં આવશે. આ કાર્યવાહીનો મુખ્ય ઉદ્દેશ્ય ટ્રાફિક નિયમોનું પાલન સુનિશ્ચિત કરવાનો અને જાહેર માર્ગો પર સુરક્ષા વધારવાનો છે.