જમીન સંપાદનમાં લેન્ડ વેલ્યુ વધારવાના પ્રયાસ બદલ મહેસૂલ અધિકારી સસ્પેન્ડ

રાજ્ય સરકારને આર્થિક નુકસાન પહોંચાડવાના પ્રયાસ બદલ મહેસૂલ વિભાગના એક અધિકારી સામે કડક કાર્યવાહી કરવામાં આવી છે. અમદાવાદના અસલાલી સબ રજિસ્ટ્રાર આર. સી. રબારી, જેઓ અગાઉ થરાદમાં સબ રજિસ્ટ્રાર તરીકે ફરજ બજાવતા હતા, તેમને ફરજ પરથી સસ્પેન્ડ કરવામાં આવ્યા છે.

આ કાર્યવાહી થરાદ-અમદાવાદ હાઇવેના નિર્માણ માટે જમીન સંપાદન પ્રક્રિયા દરમિયાન સામે આવી છે. આરોપ છે કે આર. સી. રબારીએ તેમના કાર્યકાળ દરમિયાન જમીનની બજાર કિંમત કરતાં વધુ મૂલ્યાંકન દર્શાવીને સરકારને ચૂનો લગાવવાનો પ્રયાસ કર્યો હતો. આ મામલે તેમની સામે તપાસ હાથ ધરવામાં આવી હતી.

મળતી માહિતી મુજબ, થરાદના તત્કાલિન સબ રજિસ્ટ્રાર આર.સી. રબારીના કાર્યકાળ દરમિયાન તૈયાર કરાયેલા કુલ 74 દસ્તાવેજોની ઝીણવટભરી તપાસ કરવામાં આવી હતી. આ તપાસમાં જમીનના વેલ્યુએશનમાં ગેરરીતિ આચરવામાં આવી હોવાનું અને દસ્તાવેજોનું મૂલ્યાંકન ઓછું દર્શાવીને સરકારને આર્થિક નુકસાન પહોંચાડવાનો પ્રયાસ થયો હોવાનું બહાર આવ્યું હતું. આ તપાસના તારણોના આધારે સરકારે આકરા પગલાં ભર્યા છે.