હાલોલ નજીક રામજીખાંટના મુવાડા ગામે ૩૦ જરૂરિયાતમંદ વિધવા મહિલાઓને અન્નકિટનું વિતરણ

શ્રીજી સેવા કેન્દ્ર દ્વારા સમાજ ઉપયોગી કાર્યો કરવામાં આવે છે. તેના ભાગરૂપે, સંસ્થાના અગ્રણી શ્રી રાજેન્દ્રભાઈ શાહની ઉપસ્થિતિમાં અને પૂ.પા.ગોસ્વામી શ્રી રવિકુમાર મહારાજશ્રીની અધ્યક્ષતા હેઠળ હાલોલ તાલુકાના રામજીખાંટના મુવાડા ગામે એક અન્નકિટ વિતરણ કાર્યક્રમનું આયોજન કરવામાં આવ્યું હતું.

આ કાર્યક્રમમાં કુલ ૩૦ જરૂરિયાતમંદ વિધવા મહિલાઓને અન્નકિટનું વિતરણ કરવામાં આવ્યું. આ કિટમાં ઘઉંનો લોટ, ચોખા, તેલ, ખાંડ, ગોળ, મગ, મીઠું, ચા અને હું કે સાબુ જેવી જીવનજરૂરી ચીજવસ્તુઓનો સમાવેશ થાય છે. આ ઉપરાંત, મહિલાઓને સ્ટીલના વાસણોનો સેટ પણ ભેટ આપવામાં આવ્યો હતો.

શ્રીજી સેવા કેન્દ્ર દ્વારા આવા સેવાકીય કાર્યો નિયમિતપણે કરવામાં આવે છે, જે સમાજમાં જરૂરિયાતમંદ લોકો માટે ખૂબ જ મદદરૂપ થાય છે. 'સેવા જ પરમો ધર્મ'ના સૂત્રને સાર્થક કરતું આ કાર્ય અનેક લોકો માટે પ્રેરણારૂપ બન્યું છે.