અમદાવાદ: થેલેસેમિયા ગ્રસ્ત બાળકો માટે 'મુસ્કાન માટે રક્તદાન' કેમ્પમાં ૬૩૨ યુનિટ રક્ત એકત્ર

થેલેસેમિયા ગ્રસ્ત બાળકોની સહાયતાના ઉમદા હેતુ સાથે અમદાવાદ શહેર પોલીસ દ્વારા રેડ ક્રોસ સોસાયટીના સહયોગથી "મુસ્કાન માટે રક્તદાન 2026" અંતર્ગત એક વિશાળ મહારક્તદાન કેમ્પનું સફળતાપૂર્વક આયોજન કરવામાં આવ્યું. આ કાર્યક્રમ ડીસીપી ઝોન 6 હેઠળ આવતા નારોલ, દાણીલીમડા, કાગડાપીઠ, ઇસનપુર અને મણિનગર પોલીસ સ્ટેશનો તેમજ ACP K-ડિવિઝન અને ACP J-ડિવિઝન દ્વારા સંયુક્ત રીતે એકા ક્લબ (કાંકરિયા, મણિનગર) ખાતે યોજાયો હતો.

આ મહારક્તદાન કેમ્પમાં શહેરના નાગરિકો, પોલીસ જવાનો, હોમગાર્ડ્સ અને મીડિયા મિત્રોએ ઉત્સાહભેર ભાગ લીધો હતો. સૌના અભૂતપૂર્વ સહયોગ અને માનવતાવાદી ભાવનાના કારણે કુલ ૬૩૨ યુનિટ રક્ત એકત્રિત કરવામાં સફળતા મળી હતી. આ એકત્રિત થયેલ રક્ત થેલેસેમિયાથી પીડિત બાળકોના જીવનમાં નવી આશા અને ખુશી લાવશે તેવી અપેક્ષા છે.

આ આયોજનનો મુખ્ય ઉદ્દેશ્ય થેલેસેમિયા જેવી ગંભીર બીમારીથી પીડિત બાળકોને નિયમિત રક્તદાનની જરૂરિયાત પૂરી પાડવાનો હતો. પોલીસ વિભાગ અને રેડ ક્રોસ સોસાયટીના સંયુક્ત પ્રયાસોને શહેરવાસીઓએ ખૂબ જ સકારાત્મક પ્રતિસાદ આપ્યો, જે સમાજ પ્રત્યેની તેમની પ્રતિબદ્ધતા દર્શાવે છે.