સુરતમાં કારખાનામાં ચોરી કરવા ઘૂસેલા બે ચોર ગેલેરીમાં ફસાયા, ફાયર વિભાગે રેસ્ક્યુ કર્યું

સુરતના બમરોલી રોડ પર આવેલા એક કારખાનામાં ચોરી કરવાના ઈરાદે ઘૂસેલા બે ચોર ગેલેરીના ભાગમાં ફસાઈ જતાં મુશ્કેલીમાં મુકાયા હતા. ચોરી બાદ બહાર નીકળતી વખતે બંને ચોર ગેલેરીમાં ફસાઈ ગયા હતા અને બચાવો બચાવોની બૂમો પાડવા લાગ્યા હતા.

આસપાસના સ્થાનિક લોકોએ ચોરોની બૂમો સાંભળીને તાત્કાલિક ફાયર વિભાગ અને પોલીસને જાણ કરી હતી. માહિતી મળતાં ફાયર વિભાગની ટીમ ઘટનાસ્થળે પહોંચી હતી. ફાયર વિભાગના જવાનોએ ભારે જહેમત બાદ બારીના સળિયા કાપીને ગેલેરીમાં ફસાયેલા બંને ચોરોનું સફળતાપૂર્વક રેસ્ક્યુ કર્યું હતું.

રેસ્ક્યુ બાદ પોલીસે બંને ચોરની ધરપકડ કરી હતી. પોલીસે બંને આરોપીઓને કસ્ટડીમાં લઈને વધુ તપાસ હાથ ધરી છે, જેમાં તેઓ અન્ય કોઈ ગુનામાં સામેલ છે કે કેમ તે અંગે પૂછપરછ કરવામાં આવશે.