સાયલા હાઈવે પર મેંદાની આડમાં વિદેશી દારૂનો જથ્થો ઝડપાયો, ટ્રક ચાલક ઝડપાયો

અમદાવાદ-રાજકોટ નેશનલ હાઈવે પર સાયલા નજીક રાજકોટ રેન્જ સ્ક્વોડે એક મોટી કાર્યવાહી કરી છે. પોલીસે ટ્રકના કેબિનમાં બનાવેલા ગુપ્ત ચોરખાનામાંથી વિદેશી દારૂનો મોટો જથ્થો ઝડપી પાડ્યો છે. મેંદાના લોટની બોરીઓની આડમાં આ દારૂની હેરાફેરી કરવામાં આવી રહી હતી. પોલીસે ટ્રક ડ્રાઇવરની ધરપકડ કરી છે અને વાહન તથા દારૂ સહિત કુલ ₹19.52 લાખનો મુદ્દામાલ જપ્ત કર્યો છે.

રાજકોટ રેન્જના નાયબ પોલીસ મહાનિરીક્ષક નિર્લિપ્ત રાયની સૂચના અને રેન્જ પી.આઈ. અપૂર્વ પટેલના માર્ગદર્શન હેઠળ પોલીસ સબ-ઇન્સ્પેક્ટર પી.એન. મોરી અને તેમની ટીમે સાયલા વિસ્તારમાં વોચ ગોઠવી હતી. દરમિયાન, અમદાવાદ-રાજકોટ નેશનલ હાઈવે પર આવેલી મોમાઈ હોટલના પાર્કિંગમાં શંકાસ્પદ હાલતમાં પાર્ક કરેલા ટ્રક (નંબર RJ-30-GA-6939)ની તલાશી લેવામાં આવી હતી.

પોલીસ તપાસ દરમિયાન ટ્રકમાં મેંદાના લોટની 588 બોરીઓ ભરેલી હોવાનું જણાયું હતું. જોકે, વધુ ઝીણવટભરી તપાસ કરતાં પોલીસને ડ્રાઇવરની કેબિન પાછળ ખાસ બનાવેલું ગુપ્ત ચોરખાનું મળી આવ્યું હતું. આ ચોરખાનામાંથી ભારતીય બનાવટની પરપ્રાંતીય વિદેશી દારૂની 144 બોટલો મળી આવી હતી, જેની કિંમત ₹1,64,400 થાય છે.

પોલીસે સ્થળ પરથી વિદેશી દારૂની 144 બોટલો, મેંદાની 588 બોરીઓ અને ટ્રક સહિત અન્ય સામાન મળી કુલ ₹19,52,004 નો મુદ્દામાલ જપ્ત કર્યો છે. પોલીસે ટ્રક ચાલક રમેશચંદ્ર દેવકિશન સુથાર (રહે. રાજસમંદ, રાજસ્થાન)ની ધરપકડ કરી છે. જોકે, આ દારૂનો જથ્થો ભરાવી આપનાર મુખ્ય સૂત્રધાર મુકેશ (રહે. રાજકોટ) પોલીસને ચકમો આપી ફરાર થવામાં સફળ રહ્યો છે. પોલીસે બંને શખ્સો સામે સાયલા પોલીસ સ્ટેશનમાં પ્રોહિબિશન એક્ટ મુજબ ગુનો નોંધી ફરાર આરોપીને ઝડપી પાડવા વધુ તપાસ હાથ ધરી છે.