ନକଲି ନୋଟ୍‌ରେ ବାଇକ୍ କିଣିବା ବେଳେ ଧରିଲା ପୁଲିସ

ନକଲି ନୋଟରେ ବାଇକ କିଣିବା ପଡ଼ିଲା ମହଙ୍ଗା । ୪୫ ହଜାର ନକଲି ନୋଟ ଦେଇ ସ୍କୁଟି କିଣୁଥିବାବେଳେ ଜଣେ ନାବାଳକଙ୍କୁ ପୁଲିସ ଧରିଛି । ଘଟଣା ଘଟିଛି ବରଗଡ଼ ସହରରେ । ବରଗଡ଼ ସହରର ସ୍ୱାଗତ ସାହୁ ନିଜ OLA ସ୍କୁଟିକୁ ବିକ୍ରି ପାଇଁ OLXରେ ବିଜ୍ଞାପନ ଦେଇଥିଲେ l ବିଜ୍ଞାପନ ଦେଖି ଜଣେ ନାବାଳକ ସେହି ସ୍କୁଟି କିଣିବାକୁ ତାଙ୍କ ପାଖକୁ ଯାଇଥିଲେ । ଆଉ ପ୍ରାୟ ୪୫ ହଜାର ଟଙ୍କାରେ ସ୍କୁଟି କିଣିବା ପାଇଁ ଉଭୟଙ୍କ ମଧ୍ୟରେ ଡିଲ୍ ଫାଇନାଲ ହୋଇଥିଲା ।
ନାବାଳକ ଜଣଙ୍କ ତାଙ୍କୁ ୪୫ ହଜାର ଟଙ୍କା ଦେଇଥିଲେ । ଟଙ୍କାକୁ ଗଣିବା ବେଳେ ଟଙ୍କା ସବୁ ନକଲି ହୋଇଥିବା ସନ୍ଦେହ ହେବାରୁ ସେ ପ୍ରଥମେ ବ୍ୟାଙ୍କ ଓ ପରେ ଟାଉନ ଥାନା ଦ୍ୱାରସ୍ଥ ହୋଇ ଘଟଣା ସମ୍ପର୍କରେ ଜଣାଇଥିଲେ । ଏନେଇ ବରଗଡ଼ ପୋଲିସ ତଦନ୍ତ ଆରମ୍ଭ କରିବା ସହ ଜଣେ ନାବାଳକକୁ ଅଟକ ରଖି ଅଧିକ ତଦନ୍ତ ଜାରି ରଖିଛି ।ନକଲି ନୋଟରେ ୫୦୦, ୨୦୦ ଓ ୧୦୦ ଟଙ୍କିଆ ନୋଟ ରହିଛି । କେଉଁ ସ୍ଥାନରୁ ନକଲି ନୋଟ ଆସିଲା । ନକଲି ନୋଟ ଘଟଣାରେ ଆଉ କାହା କାହାର ସଂପୃକ୍ତି ରହିଛି ସେନେଇ ପୋଲିସ ଅଧିକ ତଦନ୍ତ ଜାରି ରଖିଛି । ପ୍ରାଥମିକ ତଦନ୍ତରୁ ନାବାଳକ ଜଣଙ୍କ ଅନଲାଇନରୁ ଟଙ୍କା ଆଣିଥିବାର ପୁଲିସ ଜାଣିବାକୁ ପାଇଛି । ଏନେଇ ପୋଲିସର କୌଣସି ପ୍ରତିକ୍ରିୟା ମିଳିପାରିନାହିଁ l