બનાસકાંઠાના શિક્ષકને હનીટ્રેપમાં ફસાવ્યાનો આરોપ, ત્રણ આરોપીઓની ધરપકડ

બનાસકાંઠા જિલ્લાના દાંતા પંથકમાં સરકારી શાળાના શિક્ષકને પૂર્વ શિક્ષક મહેબૂબ ખાન અને અન્ય સાથીઓ દ્વારા હનીટ્રેપમાં ફસાવવાનો આરોપ લાગ્યો છે. પોલીસ તપાસમાં જાણવા મળ્યું કે, શિક્ષકને જંગલ વિસ્તારમાં લઇ જવામાં આવ્યા અને ખોટા બળાત્કારનો કેસ દાખલ કરવાની ધમકી સાથે રૂપિયા 5 લાખની ખંડણી માગવામાં આવી હતી. ભયમાં શિક્ષકે રોકડ અને ઑનલાઇન ટ્રાન્સફર દ્વારા કુલ ₹1.15 લાખ આરોપીઓને ચૂકવ્યા હતા.

LCB પોલીસની તપાસ ટીમ, જે PI ડી એમ રાઠોડની આગેવાની હેઠળ અને IG પરીક્ષિતા રાઠોડ તથા જિલ્લા પોલીસ વડા પ્રશાંત સુંબેઇની સૂચનાથી કાર્યરત હતી, તેણે મહેબૂબ ખાન, સલીમ ખાન અને નરસિંહ રાવલની ધરપકડ કરી. ત્રણેય આરોપીઓને પાલનપુર શહેર પૂર્વ પોલીસ સ્ટેશનમાં સોંપવામાં આવ્યા છે.

પોલીસના જણાવ્યા મુજબ, નરસિંહ રાવલ સામે અગાઉ હનીટ્રેપનો કેસ નોંધાયેલો હતો, જ્યારે સલીમ ખાનનો ધાનેરા પોલીસ સ્ટેશનમાં ગુનાહિત ઇતિહાસ છે. તપાસ ચાલુ છે અને અન્ય સંડોવાયેલા આરોપીઓ હજુ ફરાર છે.

આ ઘટનામાં મુજાહિદ ખાને, જે ખાનગી ન્યૂઝ ચેનલના પત્રકાર તરીકે ઓળખાય છે, તેમણે ફરિયાદીને ન્યૂઝની લિંક મોકલી અને સોશિયલ મીડિયા પર બદનામ કરવાની ધમકી આપી, સાથે વધુ રૂપિયા 5 લાખની માંગણી કરી હોવાનું પણ પોલીસ તપાસમાં બહાર આવ્યું છે.