पुणे: शॉर्ट सर्किटमुळे लॉन्ड्री दुकान जळून खाक, ग्राहकांचे कपडेही भस्मसात

पुणे जिल्ह्यातील खेड शिवापूर येथे एका मेहनती कुटुंबावर मोठे संकट ओढवले आहे. परीट समाजातील पुणे जिल्हा माजी लॉन्ड्री अध्यक्ष प्रमोद गायकवाड यांच्या ड्रायक्लिनर्स दुकानाला अचानक आग लागली. या आगीत त्यांचे संपूर्ण दुकान जळून खाक झाले असून, त्यांच्या रोजीरोटीचे साधन हिरावले गेले आहे.

मिळालेल्या माहितीनुसार, दुकानात अचानक शॉर्ट सर्किट झाल्याने ही आग लागली. आगीच्या भयंकर ज्वाळांमध्ये २०० ते २५० ग्राहकांचे कपडे पूर्णपणे जळून गेले. यासोबतच दुकानाची संपूर्ण लाईट फिटिंग, इस्त्री, टेबल आणि इतर यंत्रसामग्रीदेखील जळून भग्नावस्थेत पोहोचली आहे. ज्यांच्या हातात रोज रोजगाराचे साधन होते, त्यांच्या हातात आज केवळ निराशा आणि राख उरली आहे.

या घटनेनंतर पुणे जिल्हा लॉन्ड्री व्यावसायिक संघटनेचे अध्यक्ष श्री. राकेश मारुती कदम यांनी सर्व लॉन्ड्री व्यवसायिकांना रात्री दुकान बंद करताना मेन स्वीच बंद करण्याची आणि आपल्या दुकानाची वायरिंग नियमितपणे तपासून घेण्याची विनंती केली आहे. हा एक दुर्दैवी प्रसंग असून, यामुळे एका कुटुंबावर मोठे आर्थिक संकट आले आहे.