અમદાવાદ ક્રાઇમ બ્રાન્ચે રાણીપમાંથી ૧.૧૫ લાખના MD ડ્રગ્સ સાથે રીઢા ગુનેગારને ઝડપ્યો

અમદાવાદ શહેરમાં નશીલા પદાર્થોના ગેરકાયદેસર વેચાણ અને હેરાફેરી અટકાવવા માટે ક્રાઇમ બ્રાન્ચ દ્વારા કડક કાર્યવાહી હાથ ધરવામાં આવી છે. ગુપ્ત બાતમીના આધારે ક્રાઇમ બ્રાન્ચની ટીમે રાણીપ વિસ્તારમાં આવેલા વૃંદાવન સોસાયટી સામેની 'રાજ હેર આર્ટ' નામની દુકાનમાંથી હિરેનકુમાર ઉર્ફે કાળીયો ઉમેશકુમાર ભટ્ટને ઝડપી પાડ્યો છે.

પોલીસે આરોપી પાસેથી ૩૮ ગ્રામ ૩૯૦ મિલીગ્રામ ગેરકાયદેસર મેફેડ્રોન ડ્રગ્સ (જેની કિંમત રૂ. ૧,૧૫,૧૭૦/- છે), બે એન્ડ્રોઇડ મોબાઇલ, રોકડ રકમ અને એક એક્સેસ ટુ-વ્હીલર મળીને કુલ રૂ. ૧,૫૫,૯૮૦/-નો મુદ્દામાલ જપ્ત કર્યો છે.

ઝડપાયેલા આરોપી હિરેન ઉર્ફે કાળીયો અગાઉ વાડજ, કાગડાપીઠ, ઘાટલોડિયા, બોડકદેવ અને ડી.સી.બી. પોલીસ સ્ટેશનમાં હત્યાનો પ્રયાસ (IPC ૩૦૭), લૂંટ, મારપીટ તેમજ દારૂ અને ડ્રગ્સ (NDPS) જેવા ૧૩ જેટલા ગંભીર બનાવોમાં ચોપડે ચડી ચૂક્યો છે. પ્રાથમિક પૂછપરછમાં તેણે આ ડ્રગ્સનો જથ્થો વેચાણ માટે રાખ્યો હોવાનું જણાવ્યું છે.