Machhimaro upar sankat

દેવભૂમિ દ્વારકા જિલ્લા ના રૂપેણ બંદરના માછીમારી ઉદ્યોગ પર સંકટ: 500 જેટલી બોટો કિનારે લાંગરવાની ફરજ, સરકારને બચાવવા અપીલ દ્વારકા: રૂપેણ બંદર ખાતે ફિશિંગ બોટના લાયસન્સ રીન્યુ ન થવાને કારણે સ્થાનિક માછીમારી ઉદ્યોગ ભારે મંદીના સકંજામાં ફસાઈ ગયો છે. વહીવટી પ્રક્રિયામાં વિલંબ અને સરકારી ઉદાસીનતાને લીધે કરોડો રૂપિયાનું વિદેશી હૂંડિયામણ કમાઈ આપતો આ ઉદ્યોગ અત્યારે મરણપથારીએ છે, જેના કારણે સ્થાનિક સાગરખેડૂઓમાં ભારે રોષ અને ચિંતાની લાગણી વ્યાપી ગઈ છે.ટોકન ન મળતા 400 થી 500 બોટો થંભી ગઈસ્થાનિક અહેવાલો અને અગ્રણી અમીન કાસમ ભેસલીયા જણાવ્યા અનુસાર, મત્સ્યઉદ્યોગ વિભાગ દ્વારા માછીમારોને જરૂરી ટોકન આપવામાં આવી રહ્યા નથી. લાયસન્સ રીન્યુઅલની કામગીરી અટકી પડવાના કારણે આશરે 400 થી 500 જેટલી ફિશિંગ બોટો દરિયામાં જવાને બદલે કિનારે જ લાંગરી રાખવાની ફરજ પડી છે. માછીમારીની સીઝન શરૂ હોવા છતાં બોટો કિનારે પડી રહેતા માછીમારો અને રોજમદારો બેકાર બન્યા છે.યોજનાઓ માત્ર કાગળ પર: સાગરખેડૂ યોજનાનો લાભ નથી મળતો સરકાર દ્વારા દરિયાકાંઠાના વિસ્તારો અને માછીમારોના વિકાસ માટે કરોડો રૂપિયાની 'સાગરખેડૂ યોજના' ચલાવવામાં આવે છે. પરંતુ રૂપેણ બંદરના વાસ્તવિક ચિત્ર કંઈક અલગ જ કહાની બયાન કરે છે. સ્થાનિક માછીમારોનો આક્ષેપ છે કે તેમને આ સરકારી યોજનાઓનો કોઈ જ લાભ મળી રહ્યો નથી. આર્થિક સહાય અને સબસિડીના અભાવે નાના માછીમારો દેવાના ડુંગર નીચે દબાતા જાય છે.કરોડોનું વિદેશી હૂંડિયામણ આપતા ઉદ્યોગને બચાવવા હાકલ રૂપેણ બંદરેથી મોટા પાયે મત્સ્ય ઉત્પાદનની નિકાસ કરીને દેશને કરોડો રૂપિયાનું વિદેશી હૂંડિયામણ (Foreign Exchange) રળી આપવામાં આવે છે. અર્થતંત્રમાં આટલું મોટું યોગદાન આપવા છતાં આ ક્ષેત્ર અત્યારે સરકારી ઉપેક્ષાનો ભોગ બન્યું છે.સ્થાનિક આગેવાનો અને માછીમાર પરિવારોએ સરકારને આક્રોશભરી અપીલ કરતા "રૂપેણ બંદર બચાવો" નો નારો બુલંદ કર્યો છે. જો વહેલી તકે લાયસન્સ રીન્યુ કરી ટોકન આપવાની પ્રક્રિયા શરૂ કરવામાં નહીં આવે, તો આગામી દિવસોમાં આંદોલન વધુ ઉગ્ર બને તેવી શક્યતા છે.તારીખ: 25 સપ્ટેમ્બર 2026 સ્ત્રોત: સ્થાનિક અહેવાલ સબિર હાજી રિપોટર