लोणावळ्यात पसरतय एम डी ड्रग्स आणि गांज्या सारख्या अमली पदार्थांचे जाळे

मोठी बातमी! लोणावळ्यात ड्रग्स आणि गांज्याच्या वाढत्या जाळ्याची चिंता; तरुणाईच्या भविष्याचा प्रश्न ऐरणीवर!

खासगी बंगल्यांतील पार्ट्या, अप्रमाणित दारू,एमडी ड्रग्स आणि गांज्याच्या कथित गैरव्यवहाराबाबत नागरिकांमध्ये संताप; अमली पदार्थांच्या तस्करीची पाळेमुळे शोधून कठोर कारवाई करण्याची जोरदार मागणी!

सुंदर थंडगार हवेचे ठिकाण तसेच निसर्गरम्य पर्यटनस्थळ म्हणून देशभर ओळख असलेल्या लोणावळा शहराला आता अमली पदार्थांच्या वाढत्या गैरवापराच्या चर्चेचे गालबोट लागण्याची भीती व्यक्त होत आहे. ड्रग्स, गांजा आणि एमडीसारख्या अमली पदार्थांच्या कथित खरेदी-विक्री व सेवनाच्या प्रकारांबाबत नागरिकांमध्ये चिंता वाढत असून, या विळख्यात तरुण पिढी अडकण्यापूर्वीच प्रशासनाने ठोस पावले उचलावीत, अशी मागणी जोर धरू लागली आहे.

विशेषतः काही खासगी बंगल्यांमध्ये आयोजित होणाऱ्या पार्ट्या, रात्रीच्या संशयास्पद हालचाली आणि आती प्रमाणात दारू आणि अमली पदार्थांच्या कथित वापराबाबत विविध स्तरांतून प्रश्न उपस्थित केले जात आहेत. पर्यटनाच्या नावाखाली शहराची प्रतिमा मलिन करणाऱ्या कोणत्याही बेकायदेशीर प्रकाराला थारा मिळू नये, अशी भावना नागरिकांमधून व्यक्त होत आहे.

लोणावळा हे मुंबई आणि पुणे या दोन महानगरांच्या मध्यवर्ती ठिकाणी असल्याने येथे दरवर्षी तसेच दर शनिवारी व रविवारी मोठ्या प्रमाणात पर्यटकांची वर्दळ असते. मात्र, याच पर्यटनाचा गैरफायदा घेऊन काही ठिकाणी अमली पदार्थांचे व्यवहार होत असल्याचा संशय व्यक्त केला जात आहे.

खासगी बंगल्यांमधील पार्ट्या, निर्जन परिसरातील संशयास्पद हालचाली आणि आती प्रमाणात दारू व अमली पदार्थांच्या सेवनाबाबतच्या तक्रारींची प्रशासनाने गांभीर्याने दखल घेणे आवश्यक आहे. विशेषतः शाळा-महाविद्यालयीन विद्यार्थी आणि २० ते ३० वयोगटातील तरुणांपर्यंत नशेचे आकर्षण पोहोचत असल्याची भीती चिंताजनक आहे.

आजची तरुणाई उद्याचे भविष्य आहे. त्यामुळे या पिढीला अमली पदार्थांपासून दूर ठेवणे ही केवळ पोलिसांची नव्हे, तर संपूर्ण समाजाची जबाबदारी आहे.

केवळ सेवन करणाऱ्यांवर नव्हे, तर पुरवठादारांच्या मुळावर घाव घालनो आता गरजेचे झालेलं आहे.

अमली पदार्थांचा प्रश्न केवळ सेवनापुरता मर्यादित नसून त्यामागील संपूर्ण पुरवठा साखळी शोधणे महत्त्वाचे आहे. अमली पदार्थ कुठून येतात? त्यांचा पुरवठा कोण करतो? त्यांची विक्री कोणत्या माध्यमातून होते? या प्रश्नांची उत्तरे शोधण्यासाठी पोलिसांनी विशेष तपास मोहीम राबवावी, तसेच तुंगार्ली, गोल्ड व्हॅली, प्रिच्छली हिल, कुणेगांव , मळवली, कुरवंडे,या परिसरामध्ये ज्या भाड्याने चालणार्या बंगल्यामध्ये दिवसा व रात्री ऊशीरा पर्यंत पुल पार्ट्या डीजे, आणि दारु पार्ट्या ,चालतात त्याच बंगल्यांन मध्ये आमली पदार्थांचा जास्तीत जास्त उपयोग केला जातो, आशा बंगल्यांवर प्रशासनाने बारकाईने लक्ष ठेवत रात्री पेट्रोलिंग करून आसले गैरप्रकार आढळल्यास त्वरित कारवाई करण्यात यावी अशी मागणी नागरिकांकडून होत आहे. अमली पदार्थांची विक्री व पुरवठा करणाऱ्यांचा शोध घ्यावा संशयास्पद ठिकाणांवर कायद्यानुसार नियमित तपासणी करावी. खासगी बंगल्यांतील पार्ट्यांवर आवश्यक ती देखरेख ठेवावी. अमली पदार्थांच्या तस्करीमागील संपूर्ण साखळी उघड करावी. शाळा व महाविद्यालयांमध्ये नशामुक्ती जनजागृती मोहीम राबवावी.

लोणावळ्यात पसरनार्या या जाळ्याला आळा बसवन्याचे मोठे आव्हान हे लोणावळा पोलिस प्रशासनासमोर उभे राहिले आहे.

लोणावळा शहर पोलीस, लोणावळा ग्रामीण पोलीस आणि संबंधित यंत्रणांनी समन्वय साधून अमली पदार्थांविरोधात सातत्यपूर्ण कारवाई करणे गरजेचे आहे. केवळ एखाद्या ठिकाणी छापा टाकून कारवाई करण्यापेक्षा या अवैध व्यवसायाची मुळे शोधून काढणे अधिक महत्त्वाचे आहे.

नागरिकांनीही संशयास्पद हालचालींबाबत अफवा न पसरवता योग्य ती माहिती पोलिसांपर्यंत पोहोचवावी. आपल्या परीसरात किंवा आजुबाजूच्या बंगल्यांन मध्ये अमली पदार्थांची विक्री किंवा सेवन आढळल्यास संबंधित यंत्रणेला कळवावे, असे आवाहन करण्यात आले आहे.

पालकांनी आपल्या तरुण मुलांच्या बदलत्या वर्तनाकडे, मित्रपरिवाराकडे आणि दिनचर्येकडे लक्ष देणे आवश्यक आहे. मुलांशी संवाद साधणे, त्यांना नशेचे दुष्परिणाम समजावून सांगणे आणि गरज भासल्यास समुपदेशनाची मदत घेणे महत्त्वाचे आहे.

नशेचे व्यसन केवळ एका व्यक्तीचे आयुष्य उद्ध्वस्त करत नाही, तर संपूर्ण कुटुंबाला त्याचे परिणाम भोगावे लागतात.

आता नागरिकांनीच पुढाकार घेण्याची वेळ आली आहे. कारण लोणावळा शहराची ओळख पर्यटन, निसर्गसौंदर्य आणि शांत वातावरण अशी आहे. ही ओळख टिकवायची असेल, तर अमली पदार्थांच्या गैरव्यवहाराविरोधात प्रशासन आणि नागरिकांनी एकत्र येणे गरजेचे आहे.

*प्रश्न एका शहराच्या प्रतिमेचा नाही, तर आपल्या तरुण पिढीच्या भविष्याचा आहे!**

अमली पदार्थांच्या विळख्यात अडकण्यापूर्वी तरुणाईला वाचवण्यासाठी आता ठोस कारवाई, प्रभावी जनजागृती आणि नागरिकांचा सक्रिय सहभाग आवश्यक आहे.

चला... एकत्र येऊया!
नशामुक्त लोणावळा, सुरक्षित लोणावळा!

म्हणुन आता! लोणावळेकरांनों शहराच्या सुरक्षित भविष्यासाठी तुमचा आवाज बुलंद करा!**