સુરતમાં JG નવરાત્રી મહોત્સવ પર પોલીસની લાલ આંખ: લાયસન્સ અને ફાયર NOC વિના આયોજન બંધ કરવાનો આદેશ

સુરતમાં નવરાત્રી મહોત્સવ દરમિયાન ખેલૈયાઓની સુરક્ષાને લઈને પુણા કેનાલ રોડ પર મંજૂરી વિના અને ફાયર સેફ્ટી સહિતના નિયમોની અવગણના કરીને શરૂ કરાયેલી ચર્ચિત JG નવરાત્રી સામે પોલીસે કડક કાર્યવાહી કરી છે. જરૂરી પ્રિમાયસીસ લાયસન્સ, પોલીસ પરવાનગી તેમજ ફાયર એનઓસી ન હોવાના કારણે સારોલી પોલીસ સ્ટેશન દ્વારા આયોજકોને કડક નોટિસ ફટકારીને આયોજન તાત્કાલિક બંધ કરવાનો આદેશ આપવામાં આવ્યો છે.

સારોલી પોલીસ ઇન્સ્પેક્ટર દ્વારા જારી કરવામાં આવેલી સત્તાવાર નોટિસ મુજબ, પુણા કેનાલ રોડ પર રોમન ડાઇન હોટલની બાજુમાં આવેલ જે.જી. નવરાત્રીનું આયોજન કરવામાં આવ્યું હતું. આ આયોજન માટે સરકારી ધારાધોરણો મુજબ જરૂરી લાયસન્સ મેળવવામાં આવ્યા ન હતા.

સરકારી ધારાધોરણો અને નિયમો અનુસાર, આવા મોટા જાહેર આયોજનો માટે તમામ જરૂરી પ્રમાણપત્રો અને દસ્તાવેજો રજૂ કરીને પોલીસ કમિશનર કચેરીની લાયસન્સ બ્રાન્ચ પાસેથી પ્રિમાયસીસ લાયસન્સ મેળવવું ફરજિયાત હોય છે. નિયમોનું પાલન ન થતાં પોલીસે આ પગલું ભર્યું છે.