અમદાવાદ એરપોર્ટ પર DRIની કાર્યવાહી: યુગાન્ડાના નાગરિક પાસેથી 5 કરોડનું કોકેઇન ઝડપાયું

અમદાવાદ એરપોર્ટ પર ડાયરેક્ટોરેટ ઓફ રેવન્યુ ઇન્ટેલિજન્સ (DRI) દ્વારા એક મોટી કાર્યવાહી કરવામાં આવી છે. DRIને મળેલા ગુપ્ત બાતમીના આધારે હાથ ધરાયેલા ઓપરેશન દરમિયાન, યુગાન્ડાના એક નાગરિક પાસેથી લગભગ 981 ગ્રામ કોકેઇનનો જથ્થો મળી આવ્યો છે. આ જપ્ત કરાયેલા કોકેઇનની આંતરરાષ્ટ્રીય બજાર કિંમત અંદાજે 5 કરોડ રૂપિયા આંકવામાં આવી છે.

DRIની ટીમે અત્યંત સાવચેતીપૂર્વક આ કાર્યવાહી પાર પાડી હતી. બાતમીના આધારે એરપોર્ટ પર વોચ ગોઠવવામાં આવી હતી અને શંકાસ્પદ યુગાન્ડાના નાગરિકને તપાસ માટે રોકવામાં આવ્યો હતો. તેની પાસેથી કોકેઇનનો જથ્થો મળી આવતાં તેને તાત્કાલિક ઝડપી લેવામાં આવ્યો.

આ મામલે DRI દ્વારા યુગાન્ડાના નાગરિકની ધરપકડ કરવામાં આવી છે અને તેની સામે કાયદેસરની કાર્યવાહી હાથ ધરવામાં આવી છે. આ કોકેઇન ક્યાંથી આવ્યું અને ક્યાં પહોંચાડવાનું હતું તે અંગેની વધુ તપાસ હાલમાં ચાલી રહી છે. આંતરરાજ્ય અને આંતરરાષ્ટ્રીય ડ્રગ્સ રેકેટના નેટવર્કને ઉજાગર કરવાની દિશામાં આ એક મહત્વપૂર્ણ પગલું મનાઈ રહ્યું છે.