અંકલેશ્વરમાં આંબોલી રોડ પર DGVCL ડીપીમાં આગ લાગતા રહેણાંક વિસ્તારમાં ભયનો માહોલ

અંકલેશ્વરના આંબોલી રોડ પર સ્થિત નૂરે ઇલાહી રેસીડેન્સી પાસે DGVCLના એક ડીપી (ડિસ્ટ્રિબ્યુશન પોલ) માં આગ લાગવાની ઘટના બની હતી. આ આગના કારણે રહેણાંક વિસ્તારમાં ભયનો માહોલ સર્જાયો હતો અને ગંભીર પરિસ્થિતિ ઊભી થઈ હતી.

સ્થાનિક રહેવાસીઓએ આક્ષેપ કર્યો છે કે ડીપીની આસપાસ ઉગતી વનસ્પતિ અને ઉપરની ઝાડની ડાળખીઓને દૂર કરવા માટે DGVCLના જવાબદારોને અગાઉ ત્રણ વખત લેખિત રજૂઆત કરવામાં આવી હતી. તેમ છતાં, DGVCL દ્વારા કોઈ કાર્યવાહી કરવામાં આવી ન હતી, જેના પરિણામે આ દુર્ઘટના બની હોવાનું કહેવાય છે.

રહેવાસીઓએ જણાવ્યું હતું કે વારંવાર રજૂઆતો કરવા છતાં DGVCLના અધિકારીઓએ આ બાબતે ધ્યાન આપ્યું ન હતું. આ બેદરકારીના કારણે ડીપીમાં આગ લાગી અને સ્થાનિક લોકોની સુરક્ષા જોખમમાં મુકાઈ હતી.