સાબરકાંઠામાં DGP કપ એથ્લેટિક્સ અને સાયક્લિંગ-2026નો ભવ્ય પ્રારંભ: રાજ્યભરના પોલીસ ખેલાડીઓ મેદાનમાં

સાબરકાંઠા પોલીસના યજમાનપદે હિંમતનગર સ્થિત સાબર સ્ટેડિયમ ખાતે 'DGP કપ એથ્લેટિક્સ અને સાયક્લિંગ-2026' રમતોત્સવનો અત્યંત ઉત્સાહભેર માહોલમાં ભવ્ય પ્રારંભ થયો છે. રાજ્યભરમાંથી આવેલા પોલીસ દળના ખેલાડીઓ પોતાની ઉત્કૃષ્ટ રમત-પ્રતિભા, શિસ્ત અને ખેલદિલી દર્શાવવા માટે આ ચાર દિવસીય સ્પોર્ટ્સ ઇવેન્ટમાં એકત્રિત થયા છે.

આ રમતોત્સવનું ઉદ્ઘાટન સમારોહ સાબર સ્ટેડિયમ ખાતે દબદબાભેર યોજાયો હતો. જેમાં ગાંધીનગર રેન્જ આઈજી વિરેન્દ્રસિંહ યાદવ, જિલ્લાના ઉચ્ચ પોલીસ અધિકારીઓ અને વિવિધ ક્ષેત્રના મહાનુભાવો ઉપસ્થિત રહ્યા હતા. મહાનુભાવોના હસ્તે શાસ્ત્રોક્ત વિધિ મુજબ દીપ પ્રાગટ્ય અને રિબન કાપીને રમતોત્સવનું સત્તાવાર ઉદ્ઘાટન કરવામાં આવ્યું હતું.

ઉદ્ઘાટન બાદ બેન્ડની મધુર ધૂનો સાથે રાજ્યભરની ભાગ લેનાર તમામ પોલીસ ટીમો દ્વારા શિસ્તબદ્ધ અને આકર્ષક માર્ચ પાસ્ટ યોજાઈ હતી. આ માર્ચ પાસ્ટ દરમિયાન રેન્જ IG દ્વારા ટીમોને સલામી આપવામાં આવી હતી. આ સ્પર્ધામાં કુલ 22 ટીમો વચ્ચે ચાર દિવસીય જંગ ખેલાશે.