અમદાવાદ: BRTS કોરિડોરમાં ખાડો બે બાઈકસવારો માટે જીવલેણ બન્યો, AMCની બેદરકારી સામે આવી

અમદાવાદ મ્યુનિસિપલ કોર્પોરેશન (AMC)ની વધુ એક ગંભીર બેદરકારી ગોમતીપુર વિસ્તારમાં સામે આવી છે. શીતલ સિનેમા સામે BRTS કોરિડોરમાં પાણીની સમસ્યાના નિરાકરણ માટે છેલ્લા આઠ દિવસથી એક ખાડો ખોદવામાં આવ્યો હતો. જોકે, આટલા દિવસો વીતી જવા છતાં ખાડા પાસે કોઈ યોગ્ય આડશ, બેરિકેડિંગ કે ચેતવણી સૂચક બોર્ડ લગાવવામાં આવ્યું નહોતું.

આ બેદરકારીના કારણે બે બાઈકસવારો ખાડામાં પડી જતાં ગંભીર રીતે ઈજાગ્રસ્ત થયા હતા. આશ્ચર્યજનક રીતે, ગોમતીપુર પોલીસ સ્ટેશન તરફથી આવતા BRTS રોડના કટઆઉટ પાસે તેમજ હાથી ગાર્ડનની સામે આવેલા કટઆઉટ પાસે પણ કોઈ સુરક્ષા વ્યવસ્થા કરવામાં આવી નહોતી. આસપાસના સર્વિસ રોડ પણ જર્જરિત હાલતમાં છે, જે અકસ્માતનું જોખમ વધારે છે.

આ ઘટના બાદ પૂર્વ સિનિયર મ્યુનિસિપલ કાઉન્સિલર ઈકબાલ શેખ દ્વારા મ્યુનિસિપલ કમિશનર અને મેયર સમક્ષ લેખિત રજૂઆત કરવામાં આવી છે. તેમણે AMCની આ ગંભીર બેદરકારી બદલ તાત્કાલિક પગલાં લેવાની માંગ કરી છે.