અમદાવાદ: ગીતામંદિર નજીકથી 7 લાખથી વધુનો નકલી મોબાઇલનો જથ્થો ઝડપાયો, 6 સામે ગુનો દાખલ

અમદાવાદના ગીતામંદિર નજીકથી પોલીસે એક મોટી કાર્યવાહી હાથ ધરી છે. LCB ઝોન 6ની ટીમે દરોડા પાડીને 1,034 નકલી મોબાઇલ ફોન, લેપટોપ અને અન્ય એસેસરીઝનો જથ્થો ઝડપી પાડ્યો છે. આ સમગ્ર મુદ્દામાલની કિંમત 7.07 લાખ રૂપિયાથી વધુ હોવાનું જાણવા મળ્યું છે.

પ્રાથમિક માહિતી અનુસાર, આ નકલી મોબાઇલ ફોન અને એસેસરીઝ શહેરના રિલીફ રોડ પર આવેલા એક માર્કેટમાંથી ખરીદવામાં આવ્યા હતા. પોલીસે આ મામલે વધુ તપાસ હાથ ધરી છે અને વેચાણ અર્થે આ નકલી માલ લાવવામાં આવ્યો હોવાની આશંકા વ્યક્ત કરી છે.

આ અંગે પોલીસે ટ્રેડમાર્ક એક્ટની વિવિધ કલમો હેઠળ ગુનો નોંધીને વધુ કાર્યવાહી હાથ ધરી છે. રમેશ સોલંકી અને જીતેન્દ્ર સહિત કુલ 6 લોકો સામે ગુનો દાખલ કરવામાં આવ્યો છે. પોલીસ આ રેકેટમાં સામેલ અન્ય લોકોની શોધખોળ પણ કરી રહી છે.