સુરતમાં મેટ્રો મુસાફરો માટે પાલિકા તૈયાર કરી રહી છે 'લાસ્ટ માઇલ કનેક્ટિવિટી પ્લાન', ડ્રીમ સિટીથી અલથાણ રૂટના 7 સ્ટેશનો પર સર્વે શરૂ

સુરત શહેરમાં મેટ્રો ટ્રેનની સુવિધા શરૂ થયા બાદ મુસાફરોને મેટ્રો સ્ટેશનથી પોતાના ઘર સુધી પહોંચવામાં કોઈ મુશ્કેલી ન પડે તે માટે સ્થાનિક મહાનગરપાલિકા દ્વારા એક વિશેષ આયોજન કરવામાં આવી રહ્યું છે. પાલિકા પ્રશાસન દ્વારા મુસાફરોની સુવિધા માટે 'લાસ્ટ માઇલ કનેક્ટિવિટી પ્લાન' તૈયાર કરવાની કામગીરી હાથ ધરવામાં આવી છે.

આ યોજના અંતર્ગત ડ્રીમ સિટીથી અલથાણ રૂટ પર આવેલા 7 મેટ્રો સ્ટેશનો પર વિશેષ સર્વે શરૂ કરવામાં આવ્યો છે. આ સર્વેના આધારે મેટ્રો સ્ટેશનથી આસપાસના વિસ્તારો અને સોસાયટીઓ સુધી પહોંચવા માટે પરિવહનની વ્યવસ્થા ગોઠવવામાં આવશે. જેથી મુસાફરોને સ્ટેશનની બહાર નીકળતા જ સરળતાથી વાહન મળી રહે.

આ પ્લાન હેઠળ મુસાફરોની સુવિધા માટે ઓટો રીક્ષાના ભાડા પણ અગાઉથી નક્કી કરવામાં આવશે. ભાડા નક્કી થવાથી મુસાફરો પાસેથી વધુ ભાડું વસૂલવાની પ્રવૃત્તિ પર રોક લાગશે અને તેઓ કોઈ પણ જાતની રકઝક વગર નિયત ભાડામાં પોતાના ગંતવ્ય સ્થાન સુધી પહોંચી શકશે. પાલિકાના આ પગલાથી મેટ્રો મુસાફરી વધુ સુવિધાજનક બનશે.