દેવળકી ખાતે ઉર્જા રાજ્ય મંત્રી શ્રી કૌશિકભાઇ વેકરીયા ના હસ્તે રુ 64 લાખના વિકાસ કાર્યોનું ખાતમુહૂર્ત

દેવળકી ખાતે ઉર્જા રાજ્ય મંત્રી શ્રી કૌશિકભાઇ વેકરીયા ના હસ્તે રુ 64 લાખના વિકાસ કાર્યોનું ખાતમુહૂર્ત

ઉનાળામાં તળાવ ઊંડા કરવાની કામગીરીના ફળ સ્વરૂપે નવા નીર આવતા ગ્રામજનોની ઉપસ્થિતિમાં નવા નીરના વધામણાં કરાયાં

અમરેલી, તા. ૨૭ - ગ્રામ્ય વિસ્તારોમાં માળખાકીય સુવિધાઓના વિકાસને વેગ આપવાના હેતુથી અમરેલી-વડીયા-કુંકાવાવ વિધાનસભા મતવિસ્તારમાં વિકાસકાર્યોની શૃંખલા અંતર્ગત વડીયા તાલુકાના દેવળકી મુકામે ઊર્જા રાજ્યમંત્રી શ્રી કૌશિકભાઈ વેકરીયાના હસ્તે આશરે રુ. ૬૪ લાખના વિવિધ વિકાસકાર્યોનું ખાતમુહૂર્ત કરવામાં આવ્યું હતું.

દેવળકી ગામમાં આંગણવાડી, સ્નાનઘાટ, સુરક્ષા દિવાલ, સીસી રોડ, બ્લોક રોડ, કોઝવે સહિતના વિવિધ વિકાસકાર્યો હાથ ધરવામાં આવશે. આ વિકાસકાર્યો પૂર્ણ થતાં ગ્રામજનોને જરૂરી માળખાકીય સુવિધાઓ વધુ સુલભ બનશે.

આ પ્રસંગે ઉનાળા દરમિયાન હાથ ધરાયેલા જળસંચયના કાર્યો અંતર્ગત ગામમાંથી પસાર થતી નદીના તળાવને ઊંડું કરવામાં આવ્યું હતું.

તાજેતરમાં વરસાદના પગલે તળાવમાં નવા નીરની આવક થતાં ઊર્જા રાજ્યમંત્રી શ્રી કૌશિકભાઈ વેકરીયાની ઉપસ્થિતિમાં ગ્રામજનો દ્વારા નવા નીરના વધામણાં કરવામાં આવ્યાં હતાં.

મંત્રીશ્રીએ વિકાસકાર્યો ગુણવત્તાયુક્ત અને સમયમર્યાદામાં પૂર્ણ થાય તે સુનિશ્ચિત કરવા સંબંધિત તંત્રને જરૂરી સૂચનાઓ આપી હતી.

આ પ્રસંગે દેવળકી ગામના શિવાલય ખાતે ગ્રામજનો દ્વારા કરવામાં આવતી અનોખી જીવદયા સેવાની પણ મંત્રીશ્રીએ સરાહના કરી હતી. ગ્રામજનો દ્વારા પ્રતિદિન આશરે ૧૫ કિલો લોટમાંથી રોટલા તૈયાર કરી શ્વાનને ખવડાવવામાં આવે છે. આ સેવા માટે ઉપયોગમાં લેવાતી સુવિધાઓનું મંત્રીશ્રીએ નિરીક્ષણ કરી ગ્રામજનોની જીવદયા પ્રત્યેની ભાવનાને બિરદાવી હતી.

આ પ્રસંગે વડીયા કુકાવાવ જિલ્લા પંચાયત બેઠકોના સભ્યશ્રીઓ, તાલુકા પંચાયતના પ્રમુખશ્રી, ઉપપ્રમુખશ્રી, સદસ્ય, દેવળકીના સરપંચ શ્રી, કુકાવાવ ખેતીવાડી ઉત્પન્ન બજાર સમિતિના ચેરમેન શ્રી, સ્થાનિક અગ્રણીઓ અને ગ્રામજનો ઉપસ્થિત રહ્યા હતા